Railway Accident रेल्‍वेतून प्रवास करणाऱ्या प्रवाशांनी दाखविलेला हलगर्जीपणा, रेल्‍वे मार्गाला कुंपण नसल्‍याने, पादचाऱ्यांकडून पुरेशी काळजी न घेता रेल्‍वे मार्ग ओलांडण्‍याचा केलेला प्रयत्‍न यामुळे गोव्‍यात रेल्‍वेमुळे होणारे अपघात वाढले आहेत.
२०१७ ते २०२२ पर्यंतची आकडेवारी पाहिल्‍यास प्रत्‍येक वर्षी सरासरी ४७ लोकांना रेल्‍वेच्‍या कक्षेत येणाऱ्या मार्गावर मृत्‍यू येतो, अशी माहिती प्राप्‍त झाली आहे.
पेडणे ते काणकोणदरम्‍यान गोव्यातील काेकण रेल्‍वेचा मार्ग असून याच मार्गावर सर्वांत जास्त अपघात होतात, हे दिसून आले आहे. यंदा जून महिन्‍यापर्यंत जी आकडेवारी उपलब्‍ध झाली आहे.
त्‍यानुसार, रेल्‍वेच्‍या अखत्‍यारितील मार्गावर 25 जणांना मृत्‍यू आला असल्‍याचे उघड झाले आहे. त्‍यापैकी सहा जणांनी रेल्‍वेखाली उडी घेऊन आत्‍महत्‍या केली तर 13 जणांना रेल्‍वेची धडक बसल्‍याने मृत्‍यू आला. सहा जणांना रेल्‍वे स्‍थानकावर मृत्‍यू आल्‍याचे नोंद झाले आहे.
या अपघातात मरणारे बहुतेक 30 ते 50 वयोगटातील असल्‍याचे दिसून आले आहे. याची कारणे शोधून काढण्‍याचा प्रयत्‍न केला असता, दारू पिलेल्‍या अवस्‍थेत रुळ ओलांडताना बहुतेकांचा बळी गेला आहे.
रेल्‍वे रुळावर कुणी येऊ नयेत यासाठी आम्‍ही आमच्‍यापरीने पूर्ण काळजी घेत आहोत, तरीही आमचा डोळा चुकवून लोक रुळ ओलांडतात. त्‍यामुळे असे अपघात घडतात, अशी माहिती आपले नाव न उघड करण्‍याच्‍या अटीवर एका रेल्‍वे पाेलिस अधिकाऱ्याने दिली.
मृत्‍यूंची आकडेवारी लक्षवेधी
2017 पासूनची आकडेवारी तपासली तर प्रत्‍येक वर्षी हे प्रमाण खाली-वर झालेले दिसते. 2017 साली या मार्गावर 50 जणांना मृत्‍यू आला होता. 2018 साली तो आकडा 43 वर पोहोचला. तर 2019 साली 57 जणांना रेल्‍वे मार्गावर मृत्‍यू आला.
2021 साली या मार्गावर 46 जणांना मृत्‍यू आला होता. 2022 साली अपघाती मृत्‍यूचे प्रमाण 59 एवढे प्रचंड होते. ही आकडेवारी लक्ष वेधण्‍यासारखी असून हे मृत्‍यू कमी व्‍हावेत यासाठी रेल्‍वेने उपाययोजना करण्‍याची गरज व्‍यक्‍त केली जात आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.