Goa Crime News: वेश्याव्यवसाय प्रकरणी धाडसत्र सुरूच! अजून एकजण हणजूणे पोलिसांच्या ताब्यात

Goa Prostitution Racket: राज्यात वाढलेल्या वेश्याव्यवसायाला आळा घालण्यासाठी पोलीस यंत्रणा सक्रिय झाली असून यामध्ये गुंतलेल्या आरोपींना अटक करण्याचे सत्र गोवा पोलिसांनी हाती घेतले आहे.

म्हापशाचे एसडीपीओ जिवबा दळवी यांनी दिलेल्या माहितीनुसार, आज (8 जुलै) कळंगुटमध्ये छापा टाकण्यात आला आणि एका आरोपीला हणजूणे पोलिसांनी ताब्यात घेण्यात आले आहे. सदर आरोपी एका ग्राहकाला मुलगी पुरवण्यासाठी आला असताना त्याला पोलिसांनी रंगेहात पकडले.

आरोपीचे नाव दीपू यादव (वय 25) तो मूळचा उत्तर प्रदेशचा रहिवासी आहे. तो कळंगुटमधील फुटबॉल ग्राउंड जवळील रिसॉर्ट डी क्रॉसरोडजवळ पोलिसांच्या सापळ्यात अडकला.

त्याच्यावर कलम 370 (A) IPC अंतर्गत गुन्हा नोंदवण्यात आला आहे. आरोपी ग्राहकांना मुलींचा पुरवठा करत असून त्यातून होणाऱ्या कमाईवर गुजराण करत असल्याचे सांगण्यात येत आहे.

दरम्यान, या प्रकरणात सुटका करण्यात आलेल्या पीडित मुलीला सुरक्षिततेसाठी संरक्षण गृहात पाठवण्यात आले आहे. उत्तर गोव्याचे एसपी शिवेंदू भूषण आयपीएस आणि एसडीपीओ जीवबा दळवी यांच्या देखरेखीखाली पुढील तपास सुरू आहे.