Pre-Monsoon Work: मान्सूनपूर्व कामे त्वरित पूर्ण करण्याच्या अधिकाऱ्यांना सूचना; हेल्पलाईनबाबत रोहन खवंटे म्हणाले...

Goa Pre-Monsoon Work: सध्या राज्यभरात मान्सूनपूर्व कामे सुरू आहेत. या कामांचा कालावधी संपत आला तरी अद्याप ही कामे पूर्ण न झाल्याने नागरिकांनी सरकारच्या नियोजनावर प्रश्नचिन्ह उपस्थित केले आहे. याबाबत सरकारी यंत्रणा आता जास्तच सक्रिय झाली असून ही कामे लवकर पूर्ण होण्यासाठी निर्देश देण्यात आले आहेत. मान्सूनपूर्व कामांच्या तयारीबाबत पर्यटनमंत्री रोहन खवंटे यांनी काल (शुक्रवारी) शासकीय विभागाच्या वरिष्ठ अधिकाऱ्यांची बैठक घेतली.

विधानसभा संकुलात झालेल्या या बैठकीला जलसंपदा विभाग, सार्वजनिक बांधकाम विभाग, विद्युत विभाग आणि अग्निशमन व आपत्कालीन सेवा विभागाचे अधिकारी उपस्थित होते.

चर्चेदरम्यान मंत्री खवंटे यांनी पंचायतींच्या अधिकाऱ्यांना आणि जलसंपदा विभागाच्या (डब्ल्यूआरडी) अधिकाऱ्यांना पावसाळा सुरू होण्यापूर्वी नाले, गटारे आणि नाल्यांचे गाळ काढण्याचे काम हाती घेण्याच्या सूचना केल्या, तसेच ही कामे त्वरित होण्यासाठी लक्ष घालण्याच्या सूचनाही केल्या आहेत.

पीडब्ल्यूडी, वीज, अग्निशमन, आपत्कालीन सेवा आणि इतर संबंधित विभागांमार्फत करायच्या कामांच्या मुद्द्यांवर या बैठकीत चर्चा करण्यात आली. याशिवाय, खवंटे यांनी सर्व संबंधित विभागांना त्यांची यंत्रणा सज्ज ठेवण्याचे आणि पावसाळ्यात कोणत्याही परिस्थितीला तोंड देण्यासाठी आवश्यक ती सर्व खबरदारी घेण्याचे निर्देश दिले आहेत .

यावेळी ते म्हणाले की, आम्ही खबरदारीची उपाययोजना म्हणून हेल्पलाईन सक्रिय करणार आहोत. सोशल मीडिया आणि स्थानिक चॅनेल्सच्या माध्यमातून हेल्पलाईन क्रमांक प्रसिद्ध केले जातील. त्यामुळे आपत्ती व्यवस्थापनादरम्यान नागरिकांना संपर्क करण्यात येणार आहे.

आम्ही राज्य आपत्ती प्रतिसाद योजना देखील सक्रिय करणार आहोत. पोलिस विभाग आधीच सज्ज असून अग्निशमन सेवेनेही योजना तयार केली असल्याचे मंत्री रोहन खवंटे यांनी यावेळी सांगितले.