पणजी: २०२० ते २०२५ या कालावधीत गोव्यात वास्तव्यास असलेल्या पोर्तुगीज पासपोर्टधारकांची संख्या ८ हजार ४५९ इतकी असल्याची माहिती विदेशी नागरिक नोंदणी कार्यालयाने दिली आहे. मुख्य मतदार अधिकारी संजय गोयल यांनी आज ही माहिती दिली.
त्यांनी सांगितले, की राज्यात वास्तव्यास असलेल्या पोर्तुगीज पासपोर्टधारकांची सविस्तर माहिती मागवली आहे. ही माहिती विदेशी नागरिक नोंदणी कार्यालय, प्रादेशिक पासपोर्ट कार्यालय आणि गृह खात्याकडून मागवली असून, मतदार यादीच्या शुद्धतेसाठी ही प्रक्रिया राबवली जात आहे.
गोयल यांनी सांगितले की, संबंधित व्यक्तींनी जर मतदार नोंदणी फॉर्म भरले असतील, तर त्यांना नोटिसा बजावल्या जातील. या नोटिसांद्वारे संबंधित व्यक्तींना सुनावणीस हजर राहून आपले नागरिकत्व आणि निवासाची स्थिती स्पष्ट करावी लागणार आहे. सुनावणीनंतरच त्यांच्या मतदार नोंदीबाबत अंतिम निर्णय घेतला जाईल.
विदेशी नागरिक नोंदणी कार्यालयातून माहिती मिळाली आहे. मात्र, उर्वरित दोन यंत्रणा प्रादेशिक पासपोर्ट कार्यालय आणि गृह खाते यांच्याकडून अद्याप यादी प्राप्त झालेली नसून, ती मिळाल्यानंतर एकत्रित पडताळणी करण्यात येणार आहे.
टप्प्याटप्प्याने होणार कारवाई
उर्वरित यादी प्राप्त झाल्यानंतर संबंधित प्रकरणांवर टप्प्याटप्प्याने कारवाई केली जाईल, अशी माहिती देण्यात आली असून, या प्रक्रियेमुळे गोव्यातील मतदार यादी अधिक पारदर्शक तसेच विश्वासार्ह बनेल, असा विश्वास निवडणूक यंत्रणेने व्यक्त केला आहे.
...तर मतदानाचा अधिकार नाही
निवडणूक आयोगाच्या मार्गदर्शक तत्त्वांनुसार, भारतीय नागरिकत्व नसलेल्या व्यक्तींना मतदार म्हणून नोंदणी करण्याचा अधिकार नाही. त्यामुळे पोर्तुगीज पासपोर्टधारकांनी जर मतदार यादीत नोंद करून घेतली असेल, तर ती कायद्याच्या चौकटीत तपासणे आवश्यक असल्याचे सीईओ कार्यालयाने स्पष्ट केले आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
