गुंड 'जेनिटो' भाजपसोबतच, दामूंनी जनतेकडे पुरावे मागू नये; जनाची नाही, मनाची लाज बाळगा, पोळजींनी राजकारण्यांचे काढले वाभाडे

Rama Kankonkar assault case Goa: सामाजिक कार्यकर्ते रामा काणकोणकर यांच्यावरील हल्ल्याला सात दिवस उलटूनही मुख्य आरोपी अद्याप पोलिसांच्या हाती लागलेला नाही, यावरून आता गोव्यातील सामाजिक कार्यकर्त्यांनी राज्य सरकारवर टीकेची झोड उठवली आहे. सामाजिक कार्यकर्ते शंकर पोळजी यांनी या प्रकरणी थेट भाजपवर गंभीर आरोप केले आहेत.

अटक केलेला संशयित भाजपचाच असल्याचा दावा

या प्रकरणातील मुख्य आरोपीला पकडण्यासाठी जनतेकडून पुरावे मागणाऱ्या भाजपचे प्रदेशाध्यक्ष दामू नाईक यांच्या भूमिकेवर शंकर पोळजी यांनी प्रश्नचिन्ह उपस्थित केले. त्यांनी दावा केला की, पोलिसांनी ज्या संशयित जेनिटोला अटक केली, तो भाजपचाच कार्यकर्ता आहे.

पोळजी म्हणाले की, जेनिटो जिल्हा पंचायतीच्या निवडणुकीदरम्यान एका भाजप कार्यकर्त्याच्या गळ्यात हार घालताना दिसला होता आणि तो स्वतः निवडणूक लढवणार असल्याच्या चर्चाही काही दिवसांपूर्वी सुरू होत्या.

त्यामुळे दामू नाईक यांनी विनाकारण काही तरी बोलू नये किंवा जनतेकडे पुरावे मागू नयेत. या घटनेबाबतचे सर्व पुरावे सोशल मीडियावर आधीच उपलब्ध असून, मुख्य आरोपी कोण आहे हे लोकांना माहीत आहे, असेही त्यांनी सांगितले.

‘पोलिसांना त्यांचे काम करू द्या’

पोळजी यांनी भाजप नेत्यांकडून पोलिसांवर दबाव आणण्याचा प्रयत्न सुरु असल्याचा आरोपही केला. ते म्हणाले, “अटक केलेला माणूस भाजपच्या जवळचा आहे, त्यांच्यातलाच कुणी राजकारणी आहे, त्यामुळे कुणाचाही बचाव करण्याचा प्रयत्न करू नये. पोलिसांवर जबरदस्ती न करता त्यांना त्यांचे काम करू द्यावे.” राजकारण्यांना जनाची नाही, किमान मनाची लाज असेल, तर त्यांनी सरकारला पाठिंबा देऊ नये, असे आवाहनही त्यांनी केले.

‘विरोधकांनी हा मुद्दा उचलून धरावा’

या प्रकरणी विरोधी पक्षांनीही आवाज उठवावा, अशी मागणी शंकर पोळजी यांनी केली. “विरोधकांनी हा मुद्दा असाच उचलून धरला पाहिजे, जेणेकरून गोवा गुन्ह्यांपासून मुक्त होईल. आम्ही शांत आणि सुशेगाद गोंयकार आहोत. पुरावे समोर असताना या घटनेचा निष्पक्ष तपास व्हावा,” अशी मागणी त्यांनी केली.