काँग्रेसच्या जाहीरनाम्यावर आज म्हापशात रंगणार जाहीर चर्चा..

म्हापसा : गोवा (Goa Politics) प्रदेश काँग्रेस (Congress) समितीच्यावतीने तयार केलेल्या जाहीरनाम्याच्या मसुद्यावर मंगळवारी 26 रोजी सायंकाळी 5.30 वाजता मरड-म्हापसा येथील मयुरा हॉटेलमध्ये जाहीर चर्चा होणार आहे.

यावेळी जाहीरनामा समिती जनतेच्या सूचना, मते इत्यादी ऐकून घेणार आहे व त्यानंतरच पक्षाचे नेते पी. चिदंबरम आणि अखिल भारतीय काँग्रेस समितीला जाहीरनाम्याचा अंतिम मसुदा सादर करण्यात येईल, अशी माहिती उत्तर गोवा जिल्हा काँग्रेसचे अध्यक्ष विजय भिके व म्हापसा गट अध्यक्ष शशांक नार्वेकर यांनी दिली. जाहीरनामा समितीचे अध्यक्ष रमाकांत खलप व उपाध्यक्ष एल्विस गोम्स यांनी यासंदर्भात प्रसृत केलेल्या पत्रकात नमूद करण्यात आले आहे, की समाजातील विविध स्तरांतील लोकांच्या विधायक सूचना ऐकून घेण्याच्या उद्देशाने या कार्यक्रमाचे आयोजन करण्यात आले आहे.

व्यापार-उदीम, शिक्षण, वित्त, समाजकल्याण, युवा आणि महिला, पर्यावरणविषयक संघटना, विद्यार्थी संघटना, अनुसूचित जमाती, मच्छीमार, मोटरसायकल पायलट, रिक्षा, टॅक्सी, टेम्पो, बसमालक संघटना, प्रख्यात व्यवसायिक, बाजारपेठेतील व्यापारी संघटना, ज्ञातिसंस्था, अल्पसंख्याक, धार्मिक संघटना, बिगरशासकीय संस्था यांच्या प्रतिनिधींना या कार्यक्रमासाठी निमंत्रित करण्यात आले आहे.