पणजी: गोवा प्रदेश काँग्रेस समितीचे (GPCC) अध्यक्ष अमित पाटकर यांनी राज्यात बनावट मतदारांचा मुद्दा उपस्थित करत खळबळ उडवून दिली आहे. राहुल गांधी यांनी बंगळूरमध्ये केलेल्या आरोपांप्रमाणेच दक्षिण गोव्यातही बनावट मतदारांचे प्रकार आढळल्याचा दावा त्यांनी केला. त्याचवेळी, त्यांनी नुकत्याच संपलेल्या विधानसभा अधिवेशनात विरोधी पक्षाच्या कामगिरीबद्दल समाधान व्यक्त केले.
पाटकर यांनी दिलेल्या माहितीनुसार, दक्षिण गोव्यामध्ये एकाच घर क्रमांकावर विविध जाती-धर्मांच्या तब्बल ८० मतदारांची नोंदणी झाल्याचे समोर आले आहे. काँग्रेसच्या गटाने यासंदर्भात पुरावे गोळा करण्यास सुरुवात केली असून, लवकरच या प्रकरणाचा पर्दाफाश केला जाईल, असे पाटकर यांनी सांगितले. निवडणुकांच्या वेळी अशा प्रकारच्या गैरप्रकारांमुळे लोकशाहीला धोका निर्माण होऊ शकतो, असेही त्यांनी नमूद केले.
नुकत्याच पार पडलेल्या तीन आठवड्यांच्या पावसाळी अधिवेशनामध्ये काँग्रेस आमदारांनी केलेल्या कामगिरीबद्दल पाटकर यांनी कौतुक केले. 'आमच्या आमदारांनी गोव्याच्या हिताच्या दृष्टीने ८१० प्रश्न विचारले आणि राज्याशी संबंधित महत्त्वाचे मुद्दे सभागृहासमोर मांडले,' असे ते म्हणाले.
विरोधी पक्षनेते आणि आमदारांनी दाखवलेल्या वचनबद्धतेची त्यांनी प्रशंसा केली. तसेच, विधिमंडळात विचारलेल्या प्रश्नांच्या उत्तरातून मिळालेल्या माहितीच्या आधारे सरकारची लवकरच पोलखोल करणार असल्याचा इशाराही त्यांनी दिला.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.