Goa Police Cup Football Tournament: वास्को स्पोर्टस क्लबने पेनल्टी शूटआऊटवर माजी विजेत्या चर्चिल ब्रदर्सला नमवून 19 व्या गोवा पोलिस कप फुटबॉल स्पर्धेच्या उपांत्य फेरीत प्रवेश केला. अन्य एका लढतीत धेंपो क्लबने एफसी तुये संघाचा 6-0 असा धुव्वा उडवून स्पर्धेतील अखेरच्या चार संघांत स्थान मिळविले.
म्हापसा येथील धुळेर स्टेडियमवर वास्को क्लब व चर्चिल ब्रदर्स यांच्यातील सामना निर्धारित वेळेत 1-1 असा गोलबरोबरीत राहिला. पेनल्टी शूटआऊटमध्ये गोलरक्षक नबकुमार घोष याच्या शानदार कामगिरीमुळे वास्को क्लबने 3-1 अशी बाजी मारली.
निर्धारित वेळेत ट्रिजॉय डायस याने 68 व्या मिनिटास केलेल्या गोलमुळे चर्चिल ब्रदर्स संघ एका गोलने आघाडीवर होता, मात्र 83 व्या मिनिटास अॅश्ली फर्नांडिस याने केलेल्या गोलमुळे वास्को क्लबने गोलबरोबरी साधली.
गिरी येथे मैदानावर धेंपो क्लबने एफसी तुये संघावर सहजपणे मात केली. आता उपांत्य फेरीत धेंपो क्लबसमोर वास्को स्पोर्टस क्लबचे आव्हान असेल.
हा सामना शुक्रवारी (ता. 17) खेळला जाईल. स्पर्धेतील पहिला उपांत्य सामना गुरुवारी (ता. 16) जीनो एफसी व कुठ्ठाळी व्हिलेजर्स यांच्यात खेळला जाईल.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
