Goa Crime: साताऱ्यातील तरुणाने गोव्यातल्या युवतीला घातला 19 लाखांचा गंडा, पोलिसांना आवळल्या मुसक्या

डिचोली: अधिक पैसे मिळवून देण्याचे आमिष दाखवून एका युवतीची जवळपास १९ लाख रुपयांची फसवणूक केल्याप्रकरणी संशयित युवकाला डिचोली पोलिसांनी अटक केली आहे. या प्रकरणात अटक केलेल्या २५ वर्षीय युवकाचे नाव साई सुनील दळवी असे असून महाराष्ट्रातील सातारा येथून डिचोली पोलिसांनी शनिवारी (२८ सप्टेंबर) त्याच्या मुसक्या आवळल्या.

संशयिताविरुद्ध काणकोणसह अन्य काही पोलिस स्थानकात गुन्हे नोंद असून संशयित अन्य पोलिस स्थानकांना हवा आहे. अशी माहिती मिळाली आहे.

यासंबंधीची माहिती अशी की, अधिक पैसे मिळवून देण्याचे आमिष दाखवून संशयित साई दळवी यांनी माझ्याकडून १८.९९ लाख ८४० रुपये लुटून माझी फसवणूक केली आहे. अशी तक्रार पाळी डिचोली येथील सोनाली सीताराम गावस या युवतीने डिचोली पोलिस स्थानकात केली होती.

या तक्रारीला अनुसरून पोलिसांनी गुन्हा नोंद करून तपास सुरू केला होता. मिळालेल्या तांत्रिक माहितीच्या आधारे पोलिसांनी कारवाई करून मोठ्या शिताफीने संशयित युवकाला सातारा येथून अटक केली.

उत्तर गोव्याचे पोलिस अधीक्षक अक्षत कौशल, डिचोलीचे पोलिस उपअधीक्षक सागर एकोस्कर आणि पोलिस निरीक्षक दिनेश गडेकर यांच्या मार्गदर्शनाखाली पोलिस उपनिरीक्षक सुनील पाटील यांच्या नेतृत्वाखालील पोलिस पथकाने ही कारवाई केली.