Panjim Smart City Mission: पणजीत पुढील आठवड्यात धावणार 22 ईव्ही बसगाड्या

Panjim Smart City Mission: स्मार्ट सिटी मिशनअंतर्गत कदंब परिवहन महामंडळाला पहिल्या टप्प्यात मिळालेल्या 22 ईव्ही बसगाड्या पुढील आठवड्यापासून सुरू होणार आहेत.

राजधानीतील सात मार्गांवर या बसगाड्या धावणार आहेत, तर दुसरीकडे महामंडळाने सुरू केलेल्या ‘माझी बस योजने’ला उत्तर गोव्यातून काहीच प्रतिसाद मिळाला नसल्याची माहिती महामंडळाचे चेअरमन उल्हास तुयेकर यांनी प्रसार माध्यमांना दिली आहे.

तुयेकर म्हणाले, गेल्या एक महिन्यापूर्वी स्मार्ट सिटीसाठी बसगाड्या आल्या होत्या, त्यावेळी रस्त्यांची कामे सुरू होती. काही रस्त्यांची कामे झाली आहेत. त्यामुळे पुढील आठवड्यात या बसगाड्या सुरू होतील.

महामंडळाकडे 200 बसगाड्यांचा तुटवडा आहे. ग्रामीण भागात पाच बसगाड्या चालतात, त्याठिकाणी दोनच बसगाड्या आहेत. त्याशिवाय बाह्य राज्य मार्गावरील बसगाड्यांची संख्याही कमी झालेली आहे. शाळांना बसगाड्यांची आवश्‍यकता आहे. 15 वर्षे झालेल्या बसगाड्या भंगारात काढलेल्या आहेत.

100 इलेक्ट्रिक बसगाड्या येणे बाकी आहेत, त्यांच्या बॅटरी न आल्याने त्या येण्यास विलंब झाला आहे. निविदा प्रक्रियेनुसार पुढील डिसेंबर किंवा जानेवारी महिन्यापर्यंत दीडशे बसगाड्या मिळतील.

महामंडळाने सुरू केलेल्या ‘माझी बस’ योजनेत आत्तापर्यंत 66 खासगी बसगाड्या जोडल्या गेल्या आहेत. सर्व बसगाड्या दक्षिण गोव्यातील आहेत, उत्तर गोव्यात खासगी बस योजनेतून प्रतिसाद कमी मिळाला आहे.