Goa News: इमारत पाडण्यासाठी अखेर महापालिकेला सापडला मुहूर्त

Goa News: महापालिकेला अखेर या महिन्यात शेजारील इमारत पाडण्यासाठी मुहूर्त सापडला. जेसीबीच्या साह्याने इमारतीचे बांधकाम पाडण्याच्या कामास संबंधित कंत्राटदाराने सुरुवात केली.

गेल्या महिन्यात आज-उद्या असे करीत इमारत पाडण्यास विलंब होत होता. महापालिकेच्या बाजूने यू आकाराचे मार्केट आहे. त्या मार्केटची दक्षिणेकडील बाजू पाडून त्या ठिकाणी 11 कोटी रुपये खर्चून इमारत उभारली जाणार आहे.

ही इमारत उभारल्यानंतर सध्याच्या महापालिकेतील सर्व कामकाज नव्या इमारतीत हलविले जाणार आहे. महापालिकेची एकूण 65 कोटी रुपये खर्चून इमारत बांधण्याचा प्रस्ताव आहे. ही रक्कम पुढे वाढण्याचीही शक्यता असली तरी सध्या मंजूर असलेल्या 11 कोटी रुपयांतून पहिल्या टप्प्यातील इमारत उभारण्याचे काम हाती घेतले आहे.

इमारत उभारण्याच्या निर्णयावर शिक्कामोर्तब झाल्यानंतर मागील महिन्यात शेवटच्या आठवड्यात इमारत पाडण्याचा निर्णय झाला होता. त्यानुसार या इमारतीतील कार्यालये व इतर साहित्य इतरत्र हलविले होते. दोनवेळा इमारतीचे बांधकाम हटविण्याचा निर्णय झाला होता; पण अमलात आला नाही. आज मात्र संबंधित कंत्राटदाराला इमारत पाडण्यासाठी मुहूर्त मिळाला.