Goa Nightclub Fire: हडफडे नाईट क्लब दुर्घटनेप्रकरणी मोठी कारवाई: चार व्यवस्थापक अटकेत, मालकाचीही चौकशी होणार

Arpora Goa Nightclub Fire Video

गोव्यातील हडफडे येथील ‘बर्च बाय रोमियो लेन’ या नाईट क्लबमध्ये लागलेल्या भीषण आगीत २५ निष्पाप लोकांचा मृत्यू झाल्याने राज्यभर खळबळ उडाली आहे. या दुर्घटनेनंतर पोलीस प्रशासनाने कारवाईचा वेग वाढवला असून, हणजूण पोलिसांनी संबंधित क्लबच्या चार व्यवस्थापकांना अटक केली आहे. तसेच या प्रकरणी क्लबच्या मालकाचीही सखोल चौकशी केली जाणार असल्याची माहिती पोलिसांनी दिली आहे.

दरम्यान, या दुर्घटनेचा एक व्हिडीओ सध्या सोशल मीडियावर मोठ्या प्रमाणात व्हायरल होत आहे. या व्हिडीओमध्ये आग लागण्याच्या काही सेकंद आधीची परिस्थिती दिसून येते. काही क्षणांतच आगीने रौद्ररूप धारण केल्यामुळे पळापळ सुरू झाल्याचे दृश्य या व्हायरल व्हिडीओमध्ये स्पष्टपणे दिसत आहे.

या घटनेत आतापर्यंत २५ जणांचा मृत्यू झाल्याची अधिकृत माहिती समोर आली आहे. यापैकी २३ जणांचा मृत्यू धुरामुळे गुदमरून झाला असून, दोन जणांचा मृत्यू थेट आगीत भाजल्यामुळे झाला आहे. या दुर्घटनेत मृत्युमुखी पडलेल्यांमध्ये तीन महिलांचा समावेश आहे.

पोलिसांनी दिलेल्या माहितीनुसार, मृतांपैकी काही जण पर्यटक असल्याचा संशय व्यक्त करण्यात येत आहे. या दुर्घटनेमुळे गोव्यातील पर्यटन क्षेत्रावर मोठा परिणाम होण्याची शक्यता असून, राज्य सरकारकडूनही या प्रकरणाची दखल घेण्यात आली आहे.