Goa News: 'गोव्यात बेरोजगारीचे प्रमाण प्रचंड मात्र आमचे मुख्यमंत्री फक्त...'

Goa News: बेरोजगारांची संख्या दिवसेंदिवस वाढत असून गोव्यातील बेरोजगारीचे प्रमाण राष्ट्रीय सरासरीपेक्षा दुप्पट असल्याचा आरोप गोवा फॉरवर्डचे अध्यक्ष विजय सरदेसाई यांनी केला आहे. गोव्यात बेरोजगारीचे प्रमाण प्रचंड असूनही आमचे मुख्यमंत्री डॉ. प्रमोद सावंत हे फक्त इव्हेंट मॅनेजमेंटमध्येच व्यस्त आहेत, अशी घणाघाती टीकाही त्यांनी केली.

काल मडगावातील पत्रकार परिषदेत सरदेसाई म्हणाले, भाजप सरकार युवकांच्या भविष्याशी खेळत आहे. सरकारतर्फे आयोजिलेल्या रोजगार मेळाव्यात सामील झालेल्या 14 हजारपैकी फक्त 557 युवकांनाच ऑफर लेटर मिळतात, ही वस्तुस्थिती आहे. पण सावंत यांच्या नेतृत्वाखालील भाजप सरकार केवळ इव्हेंट आयोजित करते.

त्यांना फक्त इव्हेंटगिरी करायची आहे. त्यातून ते सरकारचा निधीही वाया घालवत आहेत, असा आरोप त्यांनी केला. हे सरकार बेरोजगारांची संख्या लपवत आहे. यापूर्वी नीती आयोगाने राज्यातील बेरोजगारीची जी आकडेवारी दिली होती,

तीही खोटी आहे, असे म्हटले होते. पण आकडेवारी लपविली म्हणून बेरोजगारी कमी होणार नाही. बेरोजगारी कमी करायची असेल तर कौशल्य विकास योजना सुरू करण्याची गरज आहे.

‘सेंटर फॉर मॉनिटरिंग इंडियन इकॉनॉमी’ या संस्थेच्या जानेवारी महिन्याच्या आकडेवारीचा दाखला देताना सरदेसाई यांनी देशातील बेरोजगारीची सरासरी 7.1 टक्के असताना गोव्यातील सरासरी 16.2 टक्के असल्याचे सांगितले. देशातील सर्वांत जास्त बेरोजगारी असलेल्या राज्यात गोव्याचा चौथा क्रमांक लागतो, असे सांगून ही चिंता करण्यासारखी बाब असल्याचे सरदेसाई म्हणाले.

बेरोजगारांत महिलांचे प्रमाण अधिक

गोव्यात पुरुषांमध्ये बेरोजगारीचे प्रमाण 8.13 टक्के तर महिलांमध्ये 34.3 टक्के आहे. या बेरोजगारांना रोजगाराच्या संधी मिळाव्यात यासाठी पर्यटन, खनिज, उत्पादन, बांधकाम आणि मच्छीमारी या क्षेत्रांत कौशल्य विकासाचे कोर्स सुरू करावेत,

तर महिलांसाठी फ्रंट ऑफिस असिस्टंट, एडिटिंग, ग्राफिक डिझायनर, स्टोअर साहाय्यक अशा क्षेत्रांत प्रशिक्षण कोर्स सुरू करावेत, अशी सूचना सरदेसाई यांनी केली.