Goa News: रस्त्यावरील भटक्या जनावरांच्या भांडणात गर्भवती जखमी; पर्वरीतील प्रकार

Goa News: गोव्यात भटक्या जनावरांमुळे वाहनधारकांसह पादचाऱ्यांना नेहमी समस्या निर्माण होत असतात. नुकतेच एक गर्भवती भटक्या जनावरांच्या भांडणात जखमी झाली आहे. पर्वरीतील मॉल दी गोवा जवळ मुख्य रस्त्यावर बुधवारी रात्री साडे दहाच्या सुमारास हा प्रकार घडला आहे.

रस्त्याच्या कडेने ही महिला जात होती. तेव्हा रस्त्यावर दोन भटक्या गाईंमध्ये जुंपली. त्यातून एकमेकांना रेटत या गाई या महिलेच्या दिशेने आल्या. त्यातून या महिलेला दुखापत झाली आहे. ही महिला गर्भवती आहे.

सुदैवाने या महिलेसोबत असलेल्या तिच्या मुलाला मात्र काहीही झालेले नाही. जखमी झालेल्या महिलेला तातडीने बांबोळीतील गोमॅको रूग्णालयात दाखल करण्यात आले. तिथे तिच्यावर उपचार केले जात आहेत.

दरम्यान, भटक्या जनावरांमुळे अपघातांचे प्रकार घडत असतात. त्यातच आता भटक्या गुरांच्या भांडणात महिला जखमी झाल्याने भटक्या जनावरांच्या प्रश्नाने पुन्हा डोके वर काढले आहे.