पणजी मतदारसंघात मोन्सेरात कुटुंबाची दादागिरी

पणजी Goa News: नॅशनल थिएटरच्या मुद्यावर महापौरांनी आम्हाला बोलूच दिले नाही. ही खरे तर आमच्या अभिव्यक्ती स्वातंत्र्याची गळचेपी आहे. पणजीत (Panjim) मोन्सेरात कुटुंबीयांची दादागिरी सुरू आहे. या दादागिरीला निवडणुकीत सडेतोड उत्तर मिळेल, असा इशारा नगरसेवक उदय मडकईकर (Corporator Uday Madakaikar) यांनी पत्रकारांशी बोलताना दिला.

महानगरपालिकेच्या काल झालेल्या बैठकीत नॅशनल थिएटरचा मुद्दा गाजला होता. थिएटर विक्रीला काढल्यामुळे बैठकीत गोंधळ निर्माण झाला होता. त्याबाबत बोलताना मडकईकर म्हणाले, महापौरांना कोणत्याच ऐतिहासिक वास्तूबाबत माहिती नाही. ते बालिशपणे निर्णय घेत आहेत. गोव्याचा इतिहास जपण्याबाबत त्यांना आत्मीयता नाही. शिवाय त्यांचे पणजीत केवळ फॅमिली राज चालले आहे. येत्या काळात मतदार त्यांना योग्य ते उत्तर देतील.

नगरसेवक सुरेंद्र फुर्तादो म्हणाले की, महापालिकेत आम्हाला कोणत्याच विषयावर मत मांडण्याचे स्वातंत्र्य दिले जात नाही. प्रत्येकवेळी बहुमताच्या जोरावर विविध निर्णय घेतले जातात, जे गोव्याच्या हिताचे नाहीत. हे प्रकार रोखले पाहिजेत. नगरसेवक ज्‍योएल आंद्राद यांचीही यावेळी उपस्थिती होती.