Goa School : राज्यातील सर्व शाळा 5 जूनपासून होणार सुरू

Goa School : राज्यातील सर्व शाळा 5 जूनपासून सुरू होतील. पहिला नर्सरी वर्ग 3 जुलैपासून सुरू होणार आहे. नवीन अभ्यासक्रमासाठी शिक्षकांना प्रशिक्षण देण्यात येणार असल्याची माहिती शिक्षण संचालक शैलेंद्र झिंगडे यांनी ‘गोमन्तक’ला दिली. शिक्षण संचालक शैलेश यांनी सांगितले की, शाळेतील लोअर केजी ते बारावीपर्यंतचे वर्ग 5 जूनपासून सुरू होतील.

नवीन शैक्षणिक धोरण 2020 नुसार 3 जुलैपासून केवळ पायाभरणी स्तर एक म्हणजे नर्सरी स्टेज एकचा वर्ग सुरू होईल. विनाअनुदानित, अनुदानित, शासकीय पाळणाघरात पायाभूत स्तर एकवर शिकवणाऱ्या सर्व शिक्षकांना एक महिन्याच्या कालावधीसाठी नवीन शैक्षणिक धोरण 2020 नुसार अभ्यासक्रमासाठी सक्तीचे प्रशिक्षण दिले जाईल. शाळेच्या दप्तराचे वजन कमी करणे ही आमची संकल्पना असल्याचे झिंगडे यांनी स्पष्ट केले. यासाठी नवीन पाठ्यपुस्तके घरी ठेवण्यास परवानगी असून जुनी पाठ्यपुस्तके शाळेत ठेवण्यास परवानगी देण्यात आली आहे, असे ते पुढे म्हणाले.

30 टक्के पाठ्यपुस्तकांचे वितरण पूर्ण

पाठ्यपुस्तक वितरणाच्या स्थितीबाबत माहिती देताना झिंगडे म्हणाले की, आतापर्यंत बहुतांश तालुक्यांमध्ये 30 टक्के पाठ्यपुस्तकांचे वितरण पूर्ण झाले आहे. विभागाने शाळांना परिपत्रक जारी करून नवीन विद्यार्थ्यांना जुनी पाठ्यपुस्तके शाळेत ठेवण्यास सांगितले आहे. यापुढे विभाग पुन्हा विद्यार्थ्यांना नवीन पाठ्यपुस्तके देईल.