Goa Murder Case: श्रवण बर्वेचा गळा दाबून खून! शवचिकित्सा अहवालातून धक्कादायक माहिती उघड

सत्तरी: श्रवण देविदास बर्वे या २४ वर्षीय तरुणाचा मृत्यू गळा दाबल्याने झाला असल्याची धक्कादायक माहिती शवचिकित्सा अहवालातून उघड झाली आहे. आंबेडे, नगरगाव येथे हनुमान मंदिराजवळ सोमवारी (१४ एप्रिल) श्रवणचा मृतदेह आढळून आला होता. श्रवणचा मृतदेह संशयास्पद स्थितीत आढळून आल्यानंतर घातपाताचा संशय पोलिसांनी वर्तवला होता दरम्यान, हा अंदाज शवचिकित्सा अहवालातून खरा ठरल्याचे समोर आले आहे.

श्रवण देविदास बर्वे (२४) या तरुणाचा मृत्यू गळा दाबल्याने जीव गुदमरुन झाला आहे. मृत्यूवेळी त्याच्या जखमा ताज्या आणि प्राणघातक होत्या, असे शवविच्छेदन अहवालात म्हटले आहे. शवविच्छेदन अहलावातून समोर आलेल्या माहितीमुळे या प्रकरणात नवा ट्विस्ट निर्माण झाला आहे. श्रवणचा खून कोणी केला? तसेच कोणत्या कारणातून केला? याबाबत आता सवाल उपस्थित केला जात आहे.

श्रवणचे आई - वडील आणि भाऊ होंडा येथील घरी राहण्यासाठी गेले होते. सोमवारी सकाळी नगरगाव येथील घरी आल्या वडिल देविदास यांना श्रवणचा मृतदेह दिसला. यानंतर या घटनेची माहिती पोलिसांना देण्यात आली, पोलिसांनी घटनास्थळी दाखल होत पंचनामा केला. श्रवणच्या मृतदेहाजवळून काही संशयास्पद वस्तू जप्त करण्यात आल्या होत्या. त्यामुळे श्रवणचा खून करण्यात आल्याची शंका पोलिसांनी उपस्थित केली होती.

मिळालेल्या अधिकच्या माहितीनुसार, श्रवण रविवारी रात्री आयपीएल सामना पाहून घरी परतत होता. दरम्यान, याच काळात त्याच्याशी घातपात झाल्याची शक्यता वर्तवली जात आहे. शवचिकित्सा अहवालातून समोर आलेल्या माहितीमुळे श्रवणच्या हत्येतील आरोपी आणि हत्येचे कारण शोधण्याचे आव्हान पोलिसांसमोर ठाकले आहे.