Sattari Crime: हनुमान मंदिराजवळ आढळला 24 वर्षीय तरुणाचा मृतदेह; खुनाचा संशय, नगरगावात खळबळ

वाळपई: अंबेडे, नगरगाव येथे हनुमान मंदिराजवळ २४ वर्षीय तरुणाचा मृतदेह आढळून आला आहे. श्रवण बर्वे असे या तरुणाचे नाव असून, त्याचा खून करण्यात आल्याचा संशय व्यक्त केला जात आहे. सोमवारी (१४ एप्रिल) हा प्रकार उघडकीस आला.

श्रवण बर्वेचा मृतदेह संशयास्पद स्थितीत अंबेडे, नगरगाव येथील हनुमान मंदिराजवळ स्थानिकांना आढळून आला. स्थानिकांनी संबधित घटनेचे माहिती तत्काळ पोलिसांना दिली. पोलिसांनी घटनास्थळी दाखल होत घटनेचा पंचनामा केला. याप्रकरणी पोलिसांनी खुनाचा संशय व्यक्त केला असून, पोलिसांनी या दिशेने तपास करण्यास सुरुवात केली आहे.

श्रवणचा मृतेदह आढळून आल्याने सर्वत्र खळबळ निर्माण झाली. श्रवणच्या मृत्यूचे कारण स्पष्ट झाले नसून, पोलिस सर्व शक्यता तपासून पाहत असल्याची माहिती मिळाली आहे. श्रवणच्या मृतदेह शवविच्छेदनासाठी पाठविण्यात आला असून, अहवालानंतर त्याच्या मृत्यूचे नेमके कारण समजण्यास मदत होणार आहे. पोलिस या प्रकरणाचा अधिक तपास करतायेत.