Goa Weather Update: गोव्यात संपूर्ण आठवडा मुसळधार पावसाची शक्यता; सहा दिवस यलो अलर्ट

पणजी: गोव्यात संपूर्ण आठवडा मुसळधार पावसाची शक्यता असून, गोवा हवामान खात्याच्या वेधशाळेने राज्यात सहा दिवसांसाठी यलो अलर्ट जारी केला आहे. वादळी वाऱ्यासह राज्यात मुसळधार सरी बरसतील असा अंदाज वेधशाळेने वर्तवला आहे.

गोवा हवामान खात्याने दिलेल्या माहितीनुसार, राज्यात २५ ते ३० जून या मुसळधार पावसाचा अंदाज आहे. या काळात ३० ते ४० किलोमीटर प्रतितास ते ५० किलोमीटर प्रतितास वेगाने वारे वाहण्याची शक्यता आहे.

पुढील तीन तास महत्वाचे

हवामान खात्याच्या माहितीनुसार, दक्षिण आणि उत्तर गोव्यात आज (२४ जून) पुढील तीन तास मध्यम स्वरुपाच्या पावसाची शक्यता वर्तवली आहे. याकाळात ४० ते ५० किलोमीटर प्रतितास वेगाने वारे वाहण्याची शक्यता आहे. तिसवाडी, फोंडा, मुरगाव आणि सासष्टी तालुक्यावर काळे ढग असल्याचे हवामान खात्याने म्हटले आहे. इतर तालुक्यात देखील पावसाचा अंदाज व्यक्त करण्यात आली आहे.

गेल्या २४ तासांत धारबांदोडात मुसळधार

गेल्या २४ तासांत धारबांदोड्यात मुसळधार पावसाची (७६.१mm) नोंद झाली आहे. सांगे, केपे, फोंडा, साखळी, दाबोळी, काणकोण, ओल्ड गोवा, पणजी, मडगाव, मुरगाव आणि पेडण्यात (११.६ ते ६४.४ mm) दरम्यान पावसाची नोंद झाली. तर, म्हापशात सर्वात कमी ७ mm पावसाची नोंद झाली आहे.