Red Alert In Goa: रेड अलर्टमुळे गोव्यात शाळा, महाविद्यालय बंद पण अंगणवाडी सुरू? पालकांत संताप

Goa Monsoon 2023: गोवा हवामान खात्याने दिलेल्या रेड अलर्टच्या पार्श्वभूमीवर राज्यातील शाळा, महाविद्यालय बंद ठेवण्यात आली आहेत. मात्र, राज्यातील अंगणवाडी सुरू असल्याची माहिती समोर आली आहे. राज्यातील अनेक भागात अंगणवाडी भरवण्यात आल्याने पालकांनी संताप व्यक्त केला आहे.

अंगणवाडी बंद ठेवण्याबाबत सूचना मिळाली नसल्याचा खुलासा धारबांदोडा तालुक्यातील एका अधिकाऱ्याने केला आहे.

गोवा हवामान खात्याने आज (गुरूवारी) राज्यात अतिवृष्टीचा इशारा दिला आहे. त्यापार्श्वभूमीवर राज्यातील सर्व शाळा बंद ठेवण्याची सूचना शिक्षण खात्याच्या वतीने देण्यात आली. गोवा विद्यापीठाने देखील महाविद्यालय बंद ठेवण्याची सूचना दिली.

दरम्यान, अंगणवाडी बंद ठेवण्याबाबत सूचना मिळाली नसल्याने संभ्रम निर्माण झाल्याचे पाहायला मिळाले. राज्यात विविध ठिकाणी अंगणवाडी सुरू ठेवण्यात आल्याने पालकांनी संताप व्यक्त केला.

दरम्यान, याबाबत माहिती घेण्यासाठी आम्ही राज्याच्या महिला व बाल विकास विभागात संपर्क केला. महिला व बाल विकास विभागाच्या संचालक संगीता परब सचिवालयात बैठकीत असल्याचे सांगण्यात आले. त्यामुळे सुट्टीचे आदेश काढण्यात आले होते की नाही? याबाबत माहिती मिळू शकली नाही.

दरम्यान, राज्यात गुरूवारी मुसळधार पावसाच्या पार्श्वभुमीवर राज्य सरकारने आज शाळांना सुट्टी जाहीर केली आहे. शिक्षण संचालक शैलेश झिंगडे यांनी याबाबत माहिती दिली होती. महाविद्यालयांना देखील आज सुट्टी देण्यात आली. गोवा विद्यापीठाने देखील याबाबत परीपत्रक काढून विद्यापीठ कॅम्पसमधील सर्व विभागांना उद्या, 6 जुलै रोजी सुट्टी असेल, असे कळवले.

मात्र, अंगणवाडीबाबत अशी सूचना अथवा परीपत्रक समोर आले नसल्याने, संभ्रम झाल्याचे दिसून येते.