Goa Monsoon 2023 : डिचोलीत पूरसदृश स्थिती आली नियंत्रणात ; पावसाचा जोर ओसरल्याने लोकांत समाधान

Bicholim: गेल्या तीन-चार दिवसांपासून उच्छाद मांडलेल्या पावसाचा जोर शनिवारी (ता.८) थोडा कमी झाल्याने डिचोलीतील जनतेने सुटकेचा श्वास घेतला आहे. शनिवारी सकाळी आणि दुपारी वगळता जोरदार पर्जन्यवृष्टी झाली नाही. गेले तीन-चार दिवस मुसळधार पावसाने डिचोलीत सर्वत्र झोडपून काढताना धुमाकूळ घातला होता.

गेल्या चार दिवसांत घरादारांवर मिळून ३५ हून अधिक झाडांची पडझड झाली आहे. या पडझडीत खासगी आणि वीज खात्याच्या मिळून लाखो रुपयांच्या मालमत्तेचे नुकसान झाले आहे. दरम्यान, शुक्रवारी एकाच दिवशी विविध भागात मिळून २५ हून अधिक झाडांची पडझड झाली होती. त्यामुळे डिचोली अग्निशमन दलाची धावपळ झाली. शनिवारीही दलाच्या जवानांचे मदतकार्य सुरूच होते.

तूर्तास धोका टळला

तीन ते चार दिवस पडलेल्या पावसामुळे डिचोलीसह वाळवंटी नदीच्या पाण्याची पातळी वाढली होती. शुक्रवारी मुसळधार पावसाने नाद्यांनी धोक्याची पातळी गाठली होती. असाच पाऊस शनिवारी पडला असता, तर नद्यांचे पाणी बाहेर फुटण्याचा धोका होता. तशी शक्यता गृहीत धरून आपत्कालीन व्यवस्थापन विभाग सज्ज झाला होता. मात्र शनिवारी पावसाचा जोर किंचित ओसरल्याने तूर्तास धोका टळला आहे.