Victor Hospital Goa: ‘व्हिक्टर’चे ‘आरोग्‍य’ धोक्‍यात! रस्त्याच्याकडेला पसरलंय रासायनिक आणि औषधीय कचऱ्याचे साम्राज्य

Victor Hospital Goa फातोर्डा येथील व्‍हिक्‍टर इस्‍पितळाजवळ तसेच अनेक ठिकाणी रस्त्याच्या कडेला कचऱ्याचे ढीग पडलेले आहेत. यात थर्माकोल, प्लास्टिक, करवंट्या तसेच औषधीय कचऱ्याचाही समावेश आहे.

भर पावसाळ्यात मागील कित्येक दिवसांपासून हा कचरा आहे त्याच स्थितीत आहे. त्यामुळे रोगराई पसरण्याची भीती व्यक्त करण्यात येतेय.

मागील वर्षी मडगावात मलेरिया, डेंग्‍यूचे अनेक रुग्ण सापडले होते. कचरा उचल करण्याची जबाबदारी नगरपालिकेच्या स्वच्‍छता विभागाची आहे. मात्र या कचऱ्याकडे त्यांच्याकडून दुर्लक्ष करण्यात येत आहे असा आरोप नागरिक करीत आहेत.

जुन्‍या रेल्वे स्थानकापासून नव्या रेल्वे स्थानकावर येण्यासाठी असलेल्या रस्त्याच्या कडेला चार-पाच ठिकाणी कचऱ्याच्‍या राशी दिसून येतात. यात प्रामुख्‍याने मालभाट व्हिक्टर हॉस्पिटलसमोर रासायनिक तसेच औषधीय कचरा साचला आहे.

या कचऱ्यात प्लास्टिक, थर्माकोल, तोडलेल्या झाडांच्या फांद्या, नारळाच्‍या करवंट्यांचाही समावेश आहे. त्याच मार्गाने पुढे गेल्यावर इतर तीन-चार ठिकाणीही कचरा दिसतो. मागील कित्येक दिवसांपासून तो तसाच पडून आहे. या कचऱ्यात घातक वस्तूंचाही समावेश आहे.

आम्हाला आपत्कालीन सेवेसाठी कॉल आल्यावर आणि अन्य मार्गांत अडथळा आल्यावर अनेक वेळा या रस्त्याचा उपयोग करावा लागतो. मात्र या रस्त्यावर कचऱ्याच्‍या राशी असल्‍याने नियोजित ठिकाण गाठणे शक्‍य होत नाही. हा कचरा हटविण्यासाठी नगरपालिकेकडे पत्रव्यवहारही केला आहे. परंतु अजून पूर्तता झालेली नाही.

- गिल सौझा, कार्यकारी अधिकारी, मडगाव अग्निशमन दल

दक्षिण गोवा अग्निशमन दलाच्या कार्यालयापासून तळेबांद येथे जाण्यासाठी असलेल्या रस्त्याच्या कडेलाही पालिकेच्या स्वच्‍छता विभागीय कर्मचाऱ्यांकडून ओला व सुका कचरा वेगळा करण्याची प्रक्रिया दररोज करण्यात येते.

मात्र येथील कचरा उचल दरदिवशी होत नसल्याने अनेक जण रात्रीच्या वेळी काळोखाचा फायदा घेऊन कचऱ्याने भरलेल्‍या गोण्‍या तेथे आणून टाकतात.

हा परिसर स्थानिक नगरसेविका लता पेडणेकर यांच्या घरापासून हाकेच्या अंतरावर आहे त्यांनीही याकडे दुर्लक्ष केल्याने येथील परिसरात नाराजी पसरली आहे.