Savio Coutinho: मिश्र कचऱ्याने खोलगट जागा बुजविण्याचे प्रकार

Savio Coutinho: फेब्रुवारी 2022 पर्यंत सोनसोडोवरील कचरा साफ करण्‍याचा आदेश मुंबई उच्च न्यायालयाने दिला होता. तरीही रेमेडिएशन केलेला कचरा हटवण्याचे काम सुरू केले आहे. या भागातील कचरा म्हणून सरळ मिश्र स्वरूपाचा कचरा घालून रवींद्र भवन जवळील सखल भाग बुजविला जात आहे, असा आरोप शॅडो कौन्सिलचे निमंत्रक सावियो कुतिन्हो यांनी केला.

या भागात या कचऱ्याचा भराव घालून जागा बुजवली जात असताना जुन्या बाजार परिसरात मात्र असह्य दुर्गंधी पसरली आहे. सध्या या भागातील लोकांसाठी हा कचरा म्हणजे एक डोकेदुखी बनली आहे. कुतिन्हो यांनी माध्यम प्रतिनिधींसमवेत या भागाला भेट देऊन या कचऱ्यात अजूनही मोठ्या प्रमाणावर असलेले प्लास्टिक दाखवले.

न्यायालयाने लक्ष घालावे

कचऱ्याच्या भरावाने सखल भाग बुजवण्याच्या या प्रकाराचा लवकरच शॅडो कौन्सिल जाहीर निषेध व्यक्त करेल, असे कुतिन्हो यांनी सांगितले. मडगावात कचरा सफाईच्या नावाखाली चाललेले कारस्थान रोखण्यासाठी उच्च न्यायालयाने स्वतः लक्ष घालून रहिवाशांना प्रदूषणापासून मुक्ती द्यावी, अशी मागणीही त्यांनी केली आहे.