Goa News: रस्त्यांच्या दुर्दशेवरुन ‘आप’चा सावंत सरकारवर हल्लाबोल; वाचा दिवसभरातील घडामोडी

गोव्यातील रस्त्यांच्या दुरवस्थेवरून आम आदमी पार्टीने (आप) सत्ताधारी भाजप सरकारवर जोरदार निशाणा साधला आहे. भाजपच्या कथित अभियानावर हल्लाबोल केला. ‘आप’ने मुख्यमंत्री, मंत्री आणि भाजपच्या सर्व आमदारांना दुचाकीवरुन रस्त्यांची संयुक्त पाहणी करण्याचे आवाहन केले.

पुण्याच्या एका तरुणाला पार्किंगचे चलन दिल्याच्या घटनेवरुन सोशल मीडियावर निर्माण झालेल्या वादावर कळंगुटच्या सरपंचांनी कठोर प्रतिक्रिया दिली आहे. त्यांनी या संपूर्ण प्रकरणाला ‘कळंगुटचे नाव खराब करण्यासाठी रचलेला पूर्वनियोजित कट आहे’ असे म्हटले.

सरपंच म्हणाले की, या वादातील तरुणाला वाहतूक पोलीस किंवा पंचायत अधिकाऱ्यांचा परवाना मागण्याचा कोणताही अधिकार नव्हता. ‘त्या व्यक्तीने आधी वाहतूक नियमांचे उल्लंघन केले आणि नंतर कर्तव्यावर असलेल्या वाहतूक अधिकाऱ्यावरच प्रश्नचिन्ह उभे केले,’ असे ते म्हणाले.

गोव्यातील टॅक्सी व्यवसायाला नवी दिशा देण्यासाठी लवकरच एक नवीन धोरण तयार केले जाणार आहे, अशी माहिती आमदार मायकल लोबो यांनी दिली आहे. टॅक्सी ऑपरेटर आणि संबंधित अधिकाऱ्यांसोबत झालेल्या एका यशस्वी बैठकीनंतर ते बोलत होते. या नवीन धोरणामध्ये डिजिटल प्लॅटफॉर्मचा समावेश असेल, ज्यामुळे व्यवसायात अधिक पारदर्शकता येईल, असे त्यांनी सांगितले.

सर्वोच्च न्यायालयाने भटक्या कुत्र्यांबाबत नवीन मार्गदर्शक तत्त्वे जाहीर केली आहेत. भटक्या कुत्र्यांना आधी लस दिली जाईल आणि त्यानंतरच सोडले जाईल. कोणतेही आक्रमक किंवा रेबीजग्रस्त कुत्रे रस्त्यावर सोडले जाणार नाहीत. भटक्या कुत्र्यांना रस्त्यावर थेट खायला देण्यावर बंदी घातली जाणार तसंच रस्त्यावर भटक्या कुत्र्यांना खायला देणाऱ्यांवर कायदेशीर कारवाई होईल.

पोलिस खात्यात राजकीय हस्तक्षेप वाढला आहे. सत्ताधारी पक्षाच्या निर्देशांचे पालन करण्यास नकार देणाऱ्या चांगल्या अधिकाऱ्यांना बाजूला केले जात आहे. गोव्यात कायदा आणि सुव्यवस्था कोलमडली आहे आणि गुन्हेगारांनाही माहिती आहे की, पोलिसांवर नियंत्रण ठेवता येते. परिस्थिती इतकी वाईट आहे की, स्वतः पोलिसही सुरक्षित नाहीत. मी महासंचालकांना हे प्रकरण गांभीर्याने घेण्याची विनंती करतो. रवी नाईक यांना गृह खात्यात परत आणण्याची वेळ आली आहे - आमदार विजय सरदेसाई

स्वयंपूर्ण गोवा अंतर्गत माझे घर योजना आणि महसूल विभागातील सुधारणांवर मुख्यमंत्री डॉ. प्रमोद सावंत शनिवारी (२३ ऑगस्ट) सकाळी १०:३० वाजता स्वयंपूर्ण गोवा या कार्यक्रमातून जनतेशी संवाद साधणार आहेत. सर्वसामान्यांना या कार्यक्रमात सहभागी होण्याचे आवाहन महसूल खात्याच्या संयुक्त सचिवांनी केले आहे

प्रलंबित समस्या सोडवण्यासाठी मुख्यमंत्री प्रमोद सावंत आणि मंत्री मौविन गोडिन्हो यांच्याशी चर्चा करण्यासाठी 1000 हून अधिक टॅक्सी ऑपरेटर्स मंत्रालयापाशी जमले आहेत

हणजूण परिसरातून एक धक्कादायक प्रकार समोर आलाय. चालत्या गाडीत एक पर्यटक जीवाशी खेळ करत नाचताना दिसून आलाय. या घटनेचा व्हिडिओ सोशल मीडियावर मोठ्या प्रमाणात व्हायरल झालाय.

केरी, पत्रादेवी व मोले चेकनाक्यावर अन्न व औषध प्रशासनाने छापा मारून निकृष्ट दर्जाचे १७५० किलो चिकन व ५०० किलो पनीर जप्त. कर्नाटक राज्यातून आलेल्या दोन वाहने अडवून केली कारवाई.

Goa Crime: मडकई येथील इनोव्हा कारवर गोळीबार

मडकई येथील इनोव्हा कारवर गोळीबार. म्हार्दोळ पोलिसांनी केला अज्ञाताविरोधात गुन्हा नोंद. गुरुवारी रात्रीची घटना.