गोवा मराठी अकादमीतर्फे आज ‘अनवट शांताबाई’

पणजी: मराठीतील ज्येष्ठ कवयित्री शांताबाई शेळके यांच्या जन्मशताब्दीनिमित्त, गोवा मराठी अकादमीने रविवार दि. 8 मे रोजी संध्याकाळी 4.00 वाजता पणजी येथील मिनेझिस ब्रागांझा सभागृहात ‘अनवट शांताबाई’ हा कार्यक्रम आयोजित केला आहे. डॉ. वंदना बोकील कुलकर्णी यांनी या कार्यक्रमाचे संहिता संशोधन केले असून त्यांच्यासोबत पुण्याच्या अनुराधा जोशी, गौरी देशपांडे आणि दीपाली दातार या अभिवाचन करणार आहेत.

अनुप कुलथे हे या कार्यक्रमात व्हायोलीनची साथ करणार आहेत. शांताबाईंच्या रचनांची ‘अनवट शांताबाई’ ही मैफल म्हणजे रसिकांना वाङमयीन श्रीमंतीचे देणे देणारा एक आगळा वेगळा कार्यक्रम आहे.

या कार्यक्रमातील प्रभावी निवेदनातून शांताबाई स्वत:च स्वत:च्या कवितेविषयी रसिकांशी सहजसुंदर संवाद करीत आहेत असा अनुभव येतो. ‘धूळपाटी’, ‘संस्मरण’, ‘जाणता अजाणता’ या त्यांच्या ललित लेखनातील उतारे कार्यक्रमाला नव्या उंचीवर घेऊन जातात. या कार्यक्रमात गोमंतकीय रसिकांनी मोठ्या संख्येने सहभागी व्हावे, असे आवाहन अकादमीचे अध्यक्ष अनिल सामंत यांनी केले आहे.