प्रत्येक मतदानकेंद्रनिहाय स्थापन केलेल्या भाजप समित्यांची पडताळणी करण्यासाठी मुख्यमंत्री डॉ. प्रमोद सावंत, प्रदेशाध्यक्ष सदानंद शेट तानावडे, इतर काही मंत्री, काही आमदार आणि प्रमुख कार्यकर्त्यांचा समावेश असलेली 70 जणांची समिती आज स्थापन करण्यात आली.
भाजपचे केंद्रीय सहसचिव (संघटन) व्ही. सतीश यांच्या उपस्थितीत इन्‍स्‍टिट्यूट मिनेझिस ब्रागांझा सभागृहात झालेल्या बैठकीत हा निर्णय घेण्यात आला. सतीश हे आणखी दोन दिवस गोव्यात असतील.
तानावडे यांनी दिलेल्या माहितीनुसार, गणेश चतुर्थीपूर्वी २७ मतदारसंघांतील मतदानकेंद्र समित्यांच्य बैठका घेऊन या समितीतील सदस्य समित्यांची पडताळणी करणार आहेत. उर्वरीत 13 मतदारसंघांतील मतदानकेंद्र समित्यांची पडताळणी चतुर्थीनंतर केली जाणार आहे.
प्रत्येक मतदानकेंद्राच्या पातळीवर भाजपची समिती असावी असा प्रयत्न यावेळी करण्यात येत आहे. काही मतदारसंघांत सर्वच मतदानकेंद्रांवर भाजपच्या समित्या मागील निवडणुकीपर्यंत नव्हत्या.
त्यामुळे राज्यातील सर्वच मतदानकेंद्र पातळीवर भाजपच्या समित्या हव्यात असे लक्ष्य ठेवून गेले दीड वर्ष संघटनात्मक बांधणी करण्यात आली आहे.
कार्यकर्त्यांना सदैव सक्रिय ठेवणारा आणि जनतेच्या सातत्याने संपर्कात असणारा भाजप हा एकमेव पक्ष आहे. निवडणूक जवळ आली की जनतेसमोर कोणता कार्यक्रम न्यावा यासाठी आम्हाला धावाधाव करावी लागत नाही.
सदैव आम्ही पक्षाचे काम करत असलेले कार्यकर्ते आहोत. त्या कामांचा पुढील दोन दिवसांत व्ही. सतीश विविध बैठकांतून आढावा घेणार आहेत.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.