गोव्यातील शैक्षणिक संस्थांचे राष्ट्रीय यश

पणजी : देशातील सर्वोत्कृष्ट विद्यापीठांचे नॅशनल इस्टिट्युशनल रॅंकिंग फ्रेमवर्क (एनआयआरएफ) जाहीर झाले असून, या रॅंकिंगमध्ये व्यवस्थापन विभागात साखळी येथील गोवा इन्स्टिट्यूट ऑफ मॅनेजमेंट हे 36 व्या स्थानावर आहे. औषधनिर्माण विभागात पणजी येथील गोवा कॉलेज ऑफ फार्मसी हे 55 व्या क्रमांकावर आहे. ही गोव्यासाठी अभिमानास्पद बाब मानली जात आहे.

दुसरीकडे गोवा विद्यापीठाचा देशातील 100 टॉप विद्यापीठात समावेश होऊ शकला नाही. केंद्रीय शिक्षण मंत्रालयातर्फे ‘एनआयआरएफ रॅंकिंग’ शुक्रवारी जाहीर करण्यात आले. यामध्ये देशातील सर्वोत्कृष्ट शिक्षणसंस्थांच्या ‘टॉप शंभर’च्या यादीत राज्यातील तीन संस्थांचा समावेश आहे. एनआयआरएफमध्ये सलग चौथ्यांदा ‘आयआयटी मद्रास’ने बाजी मारली असून ती सर्वोत्तम संस्था ठरली.

तीन संस्थांनी मारली बाजी

व्यवस्थापन विभागात साखळी येथील गोवा इन्स्टिट्युट ऑफ मॅनेजमेंट हे 36 व्या स्थानी. (गुण 53.58)

औषधनिर्माण विभागात पणजी येथील गोवा कॉलेज ऑफ फार्मसी हे 55 व्या स्थानी. (गुण 44.72)

तर अभियांत्रिकीमध्ये फोंड्यातील नॅशनल इन्सिट्युट ऑफ टेक्नॉलॉजी गोवा हे 88 व्या क्रमांकावर. (गुण 40.48)

या आधारे ठरविले जाते मानांकन

ही क्रमवारी ठरविताना देशातील सर्वोत्कृष्ट शिक्षण संस्था, विद्यापीठे, संशोधन संस्था, अभियांत्रिकी, महाविद्यालये, व्यवस्थापन, औषधनिर्माणशास्त्र, वैद्यकीय, दंत वैद्यकीय, विधी, आर्किटेक्चर असे एकूण 11 गट निश्चित केले आहेत. हा दर्जा ठरविण्यासाठी संशोधन, सर्वसमावेशकता, पदवीधर विद्यार्थ्यांचे निकाल, संख्या आणि शिकविणे, शिकणे आणि संसाधने असे काही निकष ठरविले आहेत. त्याआधारे ही क्रमवारी जाहीर करण्यात येते.