डिचोली: डिचोली पालिकेच्या (Dicholim Municipality) रोजंदारीवरील स्वच्छता कामगारांच्या पगारात आता वाढ होणार आहे. पालिका मंडळाच्या बैठकीत तसा निर्णय घेण्यात आला आहे. या कामगारांचा विमाही उतरविण्याचा निर्णय घेण्यात आला आहे. अशी माहिती नगरसेवक सुदन गोवेकर यांनी दिली. डिचोलीचे आमदार तथा सभापती राजेश पाटणेकर (Rajesh Patnekar) यांच्या अध्यक्षतेखाली पालिका मंडळाची बैठक पालिका सभागृहात पार पडली. या बैठकीस पालिकेचे मुख्याधिकारी कबीर शिरगावकर (Kabir Shirgaonkar) नगराध्यक्ष पुंडलिक (कुंदन) फळारी, उपनगराध्यक्ष तनुजा गावकर, नगरसेवक सतिश गावकर, विजयकुमार नाटेकर, सुदन गोवेकर,रियाज बेग, निलेश टोपले, दीपा शेणवी शिरगावकर, दीपा पळ आणि पांडुरंग कोरगावकर हे सर्व नगरसेवक उपस्थित होते. स्वच्छता कामगारांच्या पगारात वाढ करतानाच पालिकेचा महसूल वाढविण्यावरही चर्चा करण्यात आली.
मलनिःसारण प्रकल्प
मलनिःसारण प्रकल्पाचा (सिव्हरेज प्रकल्प) विषयही बैठकीत चर्चेला आला. शहरातील सांडपाण्याचा बंदोबस्त होण्यासाठी मलनिःसारण प्रकल्पाचे काम प्राधान्यक्रमे मार्गी लागणे गरजेचे आहे. असे मत बैठकीत पुढे आले. प्रकल्पासाठी जागेची निवड करण्याचे बैठकीत ठरविण्यात आले. हा प्रकल्प मार्गी लागण्यासाठी स्थानिक आमदारांनी सहकार्य करावे. अशी मागणीही करण्यात आली. सॅनिटायझेशन आणि अन्य विकासात्मक कामांबाबतीतही या बैठकीत चर्चा झाली. नगरसेवकांनी आपापल्या प्रभागातील समस्या बैठकीत पुढे केल्या. विकासकामांसाठी आपले सहकार्य नक्कीच मिळणार. असे आश्वासन सभापती पाटणेकर यांनी दिले. नगराध्यक्ष श्री. फळारी यांनी स्वागत केले. या बैठकीस पालिकेचे अन्य अधिकारी उपस्थित होते.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
