'IFFI 2025'त 'ही मॅन' धर्मेंद्र यांना श्रद्धांजली वाहताना आमिर खान भावुक! जुन्या आठवणींना दिला उजाळा

गोव्यात ५६व्या इंटरनॅशनल फिल्म फेस्टिव्हल ऑफ इंडिया IFFI दरम्यान अभिनेता आमिर खानने भारतीय सिनेसृष्टीतील ज्येष्ठ अभिनेते धर्मेंद्र यांना श्रद्धांजली अर्पण केली. यावेळी बोलताना आमिरने धरमजींसोबतच्या आठवणींना उजाळा देत त्यांच्या अभिनयातील अफाट ताकद आणि व्यक्तिमत्त्वातील साधेपणाचे मनापासून कौतुक केले. हा क्षण उपस्थित प्रेक्षकांसाठीही अतिशय भावूक ठरला.

आमिरने सांगितले की, तो लहानपणापासून धर्मेंद्र यांच्या चित्रपटांचा चाहता आहे. एकेकाळी संपूर्ण देशात ‘ही मॅन’ म्हणून ओळखल्या जाणाऱ्या धर्मेंद्र यांनी केवळ ॲक्शनच नव्हे तर प्रेमकथा, कौटुंबिक नाट्य आणि गंभीर भूमिकांमधूनही प्रेक्षकांची मने जिंकली. त्यांच्या बहुआयामी अभिनयामुळे त्यांनी अनेक पिढ्यांवर अमिट छाप सोडली असल्याचे आमिरने नमूद केले.

गेल्या वर्षभरात धर्मेंद्र यांच्याशी आपले नाते अधिक जवळचे झाले होते, असे सांगताना आमिर भावुक झाला. त्याने जवळपास सात ते आठ वेळा त्यांची भेट घेतली होती आणि प्रत्येक भेट त्याच्यासाठी खास होती. एका वेळी त्याने आपला मुलगा आझादलाही सोबत नेले होते, जेणेकरून त्याला या महान कलाकाराची ओळख प्रत्यक्ष मिळावी. त्या भेटीत घालवलेले काही तास आमिरसाठी आयुष्यभर आठवणीत राहणारे ठरले.

धर्मेंद्र केवळ उत्कृष्ट अभिनेता नव्हते, तर ते अतिशय मृदू स्वभावाचे आणि स्नेही व्यक्तिमत्त्व होते, असे आमिरने सांगितले. प्रत्येकाशी प्रेमाने बोलणे, नम्रतेने वागणे आणि साधेपणाने जीवन जगणे ही त्यांची खरी ओळख होती. त्यांच्या प्रार्थना सभेला उपस्थित राहता येत नसल्याची खंतही आमिरने व्यक्त केली.

२४ नोव्हेंबर रोजी त्यांचे निधन झाले. धर्मेंद्र यांच्या जाण्याने भारतीय चित्रपटसृष्टीने एक दैदीप्यमान तारा गमावला आहे. त्यांच्या अभिनयाची जादू आणि त्यांच्या व्यक्तिमत्त्वाची आठवण चाहत्यांच्या हृदयात कायम राहणार आहे. त्यांनी दिलेला सिनेसंपदा वारसा आगामी पिढ्यांसाठी प्रेरणादायी ठरेल, यात शंका नाही.