पणजी: कोलवाळ कारागृहातील दवाखान्याच्या विभागात एका कैद्याने छळाला कंटाळून पेटवून घेऊन आत्महत्येचा प्रयत्न केल्याच्या घटनेची गोवा मानवाधिकार आयोगाने स्वेच्छा दखल घेतली आहे. याप्रकरणी आयोगाने उत्तर गोवा जिल्हाधिकारी व कारागृह महानिरीक्षकांना नोटिसा बजावल्या आहेत.
या घटनेची सखोल चौकशी करून त्याचा अहवाल १० डिसेंबर २०२४ पर्यंत सादर करण्याचे निर्देश दिले आहेत. गोमेकॉ इस्पितळात उपचार सुरू असलेल्या कैद्याची प्रकृती गंभीर आहे.
बलात्काराच्या प्रकरणातील कैदी राजू दास याने इतर कैद्यांच्या तसेच तुरुंग अधिकाऱ्यांच्या सतावणुकीला कंटाळून सॅनिटायझर प्राशन करून तसेच अंगावर छिंपडून पेटवून घेऊन आत्महत्या करण्याचा प्रयत्न केला होता. या घटनेत तो सुमारे ५० टक्के भाजला आहे. त्याच्यावर गोमेकॉत उपचार सुरू असून तो जबानी देण्यास सुस्थितीत नसल्याने डॉक्टरांनी परवानगी दिली नाही. जखमी कैदी दास याला उपचारासाठी म्हापसा इस्पितळात उशीर झाला होता. तेथील कारागृह अधिकाऱ्यांनी या प्रकरणाची प्राथमिक चौकशी केल्यानंतर १०८ रुग्णवाहिका बोलावून त्याला इस्पितळात नेण्यात आले होते. अधिकाऱ्यांच्या या निष्काळजीपणाची माहिती उघड न करण्याची तंबी तेथील कैद्यांना तसेच सुरक्षारक्षकांना देण्यात आली आहे.
याप्रकरणी तुरुंग अधिकाऱ्यांनी राजू दासवर वेळीच उपचाराची सोय न केल्याने काही कैद्यांनी संताप व्यक्त केला आहे. तुरुंग अधिकाऱ्यांविरुद्धच तक्रारी दाखल करण्यासाठी कैद्यांचा एक गट सक्रिय झाला आहे. कारागृह अधिकाऱ्यांकडून कैद्यांचा छळ होत असून त्याची तक्रार करूनही दखल घेतली जात नसल्याचा त्यांचा दावा आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.