गोव्यातील शाळांना दर्जेदार माध्यान्ह भोजन पुरवण्यासाठी अक्षय पात्रासोबत भागीदारी; स्वयं सहाय्य गटांना मुख्यमंत्र्यांचा इशारा

Goa Mid Day Meal: काही दिवसांपूर्वी सावईवेरे, केपे आणि वाळपई येथील शाळांमध्ये दिल्या जाणाऱ्या माध्यान्न आहारात अळ्या सापडल्याची धक्कादायक घटना समोर आली. यानंतर आहार पुरवणाऱ्या स्वयं सहाय्य गटाची चौकशी करण्याची मागणी करण्यात आली.

तसेच आपल्या मुलांच्या आरोग्याशी खेळ सुरू असल्याचे मत पालकांनी व्यक्त केल्यानंतर आता मुख्यमंत्री प्रमोद सावंत यांनी काही महत्वाचे निर्णय घेतले आहेत.

राज्यभरातील शाळांना दर्जेदार माध्यान्ह भोजन पुरवठा करण्यासाठी राज्य सरकारने अक्षय पात्राला बोर्डावर घेतल्याची घोषणा मुख्यमंत्री प्रमोद सावंत यांनी गुरुवारी केली. असे असले तरी, जे स्वयं-सहायता गट (SHGs) दर्जेदार जेवणाचा पुरवठा करतील त्यांचे काम सुरू ठेवण्यात येईल, असे त्यांनी सांगितले.

माध्यान्न आहारात अळ्या सापडल्याच्या वृत्तावर ते म्हणाले की, यापुढे राज्य सरकार अशा घटना खपवून घेणार नाही. विद्यार्थ्यांना दर्जेदार माध्यान्ह भोजन पुरवठा करणे गरजेचे आहे. मी सभागृहात सांगितले आहे की, दुपारचे जेवण विद्यार्थ्यांच्या फायद्यासाठी पुरवले जाते, इतर कुणाच्याही फायद्यासाठी नाही. विद्यार्थ्यांना पुरवले जाणारे दुपारचे जेवण खाण्यास पात्र असावे.

त्यामुळे अशा घटना पुन्हा घडल्या तर सरकार त्यांच्यावर दंडात्मक कारवाई करेल असा इशारा यावेळी मुख्यमंत्र्यांनी दिला.