'पार्टनर'च्या आजारपणामुळे हवा व्हिसा, रशियन महिलेच्या अर्जावर निर्णय घेण्याचे न्यायालयाचे निर्देश

पणजी: भारतीय नागरिकासोबत ‘लिव्ह-इन रिलेशन’मध्ये राहणाऱ्या रशियन महिलेच्या व्हिसाबाबत गोवा खंडपीठाने तिला मोठा दिलासा देणारे निर्देश केंद्र सरकारला दिले आहेत. महिलेने योग्य कारणांसह सादर केलेला नवा व्हिसा अर्ज तातडीने विचारात घेऊन कायद्यानुसार निर्णय घ्यावा, असे न्यायालयाने स्पष्ट केले.

महिलेचा जोडीदार आजारी असून त्याच्या देखभालीसाठी गोव्यात राहणे आवश्यक असल्याचा दावा या रशियन महिलेने याचिकेत केला होता.

मात्र, व्हिसा नियमावलीत ‘लिव्ह-इन रिलेशनशिप’ ही स्वतंत्र पात्र श्रेणी नसल्याचे कारण देत प्रशासनाने तिचा व्हिसा वाढवण्यास नकार दिला होता. या प्रकरणाची सुनावणी न्यायमूर्ती अमित जामसंडेकर आणि न्यायमूर्ती सुमन श्याम यांच्या खंडपीठासमोर झाली असताना त्यांनी यासंबधीचे निर्देश दिले आहेत.

दरम्यान, ही महिला सध्या व्यावसायिक व्हिसावर भारतात असून, तिला देशाबाहेर पाठविण्याची प्रक्रिया सध्या तरी सुरू नसल्याची माहिती केंद्र सरकारतर्फे न्यायालयात देण्यात आली आहे.