Goa Heat Wave: उन्हाचा 'कडाका' अन् घामाच्या 'धारा'; मे महिन्याच्या सुरुवातीलाच नागरिक उकाड्याने हैराण, कमाल तापमान 36 अंशांवर

पणजी: मागील दोन आठवड्यांपासून राज्यात उष्म्याचा पारा दिवसेंदिवस वाढत असून, कधी कमाल तर कधी किमान तापमानात लक्षणीय वाढ होत आहे. सोमवारी राज्यात कमाल तापमान ३६ अंशांवर पोहोचले, तर किमान तापमान २८.६ अंश सेल्सिअस नोंदविण्यात आले. हे यंदाचे आतापर्यंतचे सर्वाधिक किमान तापमान आहे. सामान्य तापमानाच्या तुलनेत कमाल तापमानात १.९ अंश, तर किमान तापमानात १.४ अंश सेल्सिअसची वाढ झाली आहे.

आर्द्रता ८३ टक्के इतकी नोंदविण्यात आली. यापूर्वी एप्रिल महिन्यातही किमान तापमान २८.६ अंशांपर्यंत गेले होते; आता मे महिन्यातही अशीच नोंद झाली आहे. सातत्याने किमान तापमानात वाढ होत असल्याने उष्मा अधिक जाणवत आहे. गेल्या दोन वर्षांतील तापमानाचा आलेख पाहता कमाल तापमान साधारण स्थिर राहिले आहे; मात्र किमान तापमानात वाढ दिसून येत आहे. यंदा एप्रिल महिन्यातही सलग दोन-तीन दिवस किमान तापमानात वाढ झाली होती.

नागरिकांनी काळजी घेण्याचे आवाहन

राज्यातील तापमानवाढीमागे अनेक कारणे असली, तरी हवेतील बाष्प व आर्द्रतेत झालेली वाढ हे प्रमुख कारण आहे. रात्री व पहाटेही आर्द्रता वाढल्याने घाम येणे, असह्य उष्मा जाणवणे अशा त्रासांना नागरिकांना सामोरे जावे लागत आहे. वाढत्या उष्म्यात नागरिकांनी योग्य ती काळजी घेण्याचे आवाहन करण्यात आले आहे.