चांदरमधील तरुणाचं पार्थिव गोव्यात आणण्यासाठी सरकारचे प्रयत्न सुरु

पणजी : चांदरमधील तरुणाची अमेरिकेत गोळ्या झाडून हत्या करण्यात आली आहे. या तरुणाचं पार्थिव गोव्यात परत आणण्यासाठी गोवा सरकार अमेरिकेतील दुतावासाच्या संपर्कात असल्याचं काळजीवाहू मुख्यमंत्री प्रमोद सावंतांनी स्पष्ट केलं आहे. 25 वर्षीय गोमंतकीय तरुणाला चोराने केलेल्या गोळीबारात अमेरिकेमध्ये जीव गमावावा लागला होता.

प्रमोद सावंत यांनी ट्विट करत गोव्यातील एनआरआय आयुक्तांचं कार्यालय सातत्याने अमेरिकेतील (America) दुतावासाशी संपर्कात असल्याचं सांगितलं आहे. चांदरमधील 25 वर्षीय तरुण जॉन डायस याचं पार्थिव परत गोव्यात आणण्यासाठी प्रयत्न सुरु असून ते गोव्यात असलेल्या कुटुंबाकडे दिले जाणार आहेत, ज्यामुळे ते जॉनच्या पार्थिवावर अंत्यसंस्कार करु शकतील. तसंच गोमंतकीय तरुणाच्या हत्येबाबत दु:खही व्यक्त केलं आहे. आपण या कठीण प्रसंगी डायस कुटुंबासोबत असल्याचंही प्रमोद सावंत म्हणाले आहेत.

जॉन हा एक चांगला फुटबॉलपटू होता. दक्षिण गोव्यातील (South Goa) चांदर आणि गिरदोली येथील क्लबसाठी तो पूर्वी गोलकिपिंग करायचा. मात्र रोजगाराच्या शोधात तो तीन वर्षांपूर्वी अमेरिकेत गेला होता. स्टोअरमध्ये चोरी करण्यासाठी आलेल्या एका बुरखाधारी व्यक्तीने जॉनवर गोळी (Attack) झाडली. गोळीबाराच्या घटनेनंतर लगेच पोलीस घटनास्थळी दाखल झाले. मात्र तोपर्यंत हल्लेखोर पसार झाला होता. पोलिसांकडून (Police) हल्लेखोराचा तपास सुरू करण्यात आला आहे.