मुख्यमंत्र्यांकडून चतुर्थीची भेट! गोमंतकीयांचे स्वस्त घराचे स्‍वप्‍न होणार लवकरच साकार

पणजी: राज्य सरकार गोमंतकीयांना १०-१५ लाख रुपयांत तालुका पातळीवर दोन शयनकक्ष असलेल्या सदनिका येत्या दोन वर्षांत उपलब्ध करणार आहे. त्यासाठीची योजना तयार करण्याचे काम सरकारने हाती घेतले असून योजनेचा कच्चा मसुदाही तयार केल्याची माहिती मुख्यमंत्री डॉ. प्रमोद सावंत यांनी आज पणजी दूरदर्शनच्या ‘हॅलो गोंयकार’ कार्यक्रमात दिली.

महिलांच्या सुरक्षिततेसाठी ठरावीक मार्गावर व शाळा महाविद्यालये सुटण्याच्यावेळी बसमध्ये पिंक फोर्सच्या पोलिस शिपाई तैनात केले जातील, असे त्यांनी एका प्रश्नावर सांगितले.

मुख्यमंत्री म्हणाले की, आता ५० लाख रुपयांचे घर घेणे, हे गोमंतकीयांच्या आवाक्यात राहिलेले नाही. भूखंड घेऊन घऱ बांधणे हे स्वप्नच राहू नये, यासाठी सरकारने ही योजना आणण्याचे ठरविले आहे. गावात अनेकांची घरे आहेत. शहरात राहणारे गोमंतकीय चतुर्थीच्या निमित्ताने गावी जात आहेत. गावी असलेले घर अपुरे पडते किंवा तेथे जमीन मालकी वादामुळे घर बांधायला मिळत नाही. गावात केवळ घरापुरती जमीन असते. आणखीन घरासाठी जमीन नसते. काहीजण असलेलेच घर विस्तारीत करून त्यात स्वतःला सामावून घेण्याचा प्रयत्न करतात.

तालुका पातळीवर शंभर सदनिका उभारणार

१) सरकारने तालुका पातळीवर गृहनिर्माण मंडळ किंवा महसूल खात्याच्या जमिनीवर इमारती उभ्या करण्याचा निर्णय घेतला आहे. या इमारतीत दोन शयनकक्ष असलेल्या सदनिका मूळ गोमंतकीयांना १०-१५ लाख रुपयांत उपलब्ध केल्या जातील.

२) तालुका पातळीवर शंभर सदनिका सरकार बांधणार आहे. त्यामुळे अनेकांचा घरांचा प्रश्न सुटेल. ही योजना लवकरच अधिसूचित केली जाईल. कारण दोन वर्षांत घरे देण्याचे लक्ष्य सरकारने ठेवले आहे.

‘म्‍हाडा’धर्तीवर योजना

स्वस्तात घरे मिळावीत, असे स्‍वप्‍न असणारे अनेक गोमंतकीय आहेत. मुंबई-महाराष्‍ट्रात ‘म्‍हाडा’सारखी गोव्‍यात योजना सुरू करावी, अशी मागणी होत होती.