'गोवा सरकारने ऊस उत्पादकांची थकित रक्कम त्वरित द्यावी'

सांगे: सरकारने ऊस उत्पादकांची थकित रक्कम त्वरित द्यावी, अशी मागणी ऊस उत्पादक संघटनेचे सदस्य सेबेस्त्यांव सिमोईश यांनी केली आहे. ज्या शेतकऱ्यांची ऊसतोड केली नाही, त्यांची ऊस तोडणी करण्यासाठी हातात दमडी नसल्याने पुढच्या वर्षी ऊस लावणे शक्य होणार नाही. त्यामुळे मुख्यमंत्री डॉ. प्रमोद सावंत यांनी या विषयात लक्ष घालून ऊस उत्पादकांना दिलासा देण्याची विनंती करण्यात येत आहे.

संजीवनी साखर कारखाना बंद पडला असतानाही राज्यातील ऊस उत्पादकांनी रोजीरोटीचा विषय म्हणून ऊस पिकाकडे दुर्लक्ष न करता मशागत करून पीक टिकवून ठेवले. त्या उत्पादकांचा ऊस तोडणी करून नेला. त्यांना प्रतिटन 2800 रुपयांप्रमाणे रक्कम अदा करणे आवश्यक आहे. सरकारने रक्कम अदा केली तर पुढील वर्षी ऊस लावणे शक्य होणार असल्याचे मत सिमोईश यांनी व्यक्त केले.