Goa Govt Introduces 'Ekadash Tirth' & 'Gomant Sarita Poojan' Initiatives
पणजी: गोवा सरकारने ‘एकादश तीर्थ’ उपक्रम हाती घेतला असून, यामध्ये राज्यातील ११ पवित्र मंदिरे एकाच आकृतीबंधात समाविष्ट केली जातील. त्याला सरिता पूजन उपक्रमाची जोड दिली असून यामुळे पर्यटकांना गोव्याच्या समृद्ध सांस्कृतिक, धार्मिक वारशाचा अनुभव घेता येईल,असे पर्यटनमंत्री रोहन खंवटे यांनी सांगितले.
‘गोमंत सरिता पूजन’ या नव्या उपक्रमाची घोषणाही त्यांनी केली. मांडवी, झुवारी आणि वाळवंटी या तीन प्रमुख नद्यांच्या संगमस्थळी (नार्वे) ही पूजाअर्चा होणार आहे. या उपक्रमामुळे गोव्याच्या पर्यटन (Tourism) क्षेत्राला नवे परिमाण मिळणार असून, पर्यटक आणि भाविकांसाठी एक वेगळा आध्यात्मिक अनुभव उपलब्ध होणार आहे.
गोव्याला (Goa) आध्यात्मिक पर्यटनाचे केंद्र म्हणून विकसित करण्याच्या दिशेने महत्त्वपूर्ण पाऊल टाकण्यात आले आहे,असे सांगून तीन दिवशीय मंदिर जोड परिषदेत गोव्याचे पर्यटन मंत्री रोहन खंवटे यांनी राज्याच्या आध्यात्मिक पर्यटन धोरणावर प्रकाश टाकला. पर्यटन विकासाच्या दृष्टिकोनातून, हरवळे धबधब्याजवळील रुद्रेश्वर मंदिराचा परिसर विकसित केला जाणार आहे. तसेच, एकादश तीर्थ योजनेतील नार्वे येथील श्री सप्तकोटेश्वर मंदिरात नव्या सुविधा उपलब्ध करून देण्यात येणार आहेत, असेही खंवटे यांनी जाहीर केले. मंदिर जोड परिषदेत मंदिरे संवर्धन, तीर्थयात्रा पर्यटन आणि वारसा जतन यासंबंधी चर्चा झाली.
परिषदेत बोलताना पर्यटन मंत्री रोहन खंवटे म्हणाले की, आध्यात्मिक पर्यटन हे गोव्याच्या पुनरुज्जीवित पर्यटन धोरणाचा महत्त्वाचा भाग आहे. ‘एकादश तीर्थ’ उपक्रम आणि ‘गोमंत सरिता पूजन’ यामुळे गोव्याच्या सांस्कृतिक आणि धार्मिक वारशाला नवी ओळख मिळेल. हा उपक्रम आध्यात्मिक पर्यटनास चालना देऊन राज्याच्या पर्यटनाच्या भविष्यासाठी एक महत्त्वाचा टप्पा ठरेल.
गंगेच्या आरतीप्रमाणेच हे पूजन आध्यात्मिक व पर्यावरणपूरक दृष्टिकोनातून आयोजित करण्यात येईल. उत्तराखंडमध्ये गंगेच्या किनारी होत असलेल्या भव्य आरतीने प्रेरित होऊन, गोवा सरकारने उत्तराखंड सरकारसोबत सामंजस्य करार केला आहे. त्यांच्या तांत्रिक आणि सांस्कृतिक अनुभवाचा आधार घेत गोव्यात पहिल्यांदाच नदी आरती सुरू केली जाणार आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.