Government Job: लांबच लांब रांगा, वाहतूक कोंडी आणि गोंधळ! 100 पदांसाठी हजारोंची गर्दी, तरुण नोकरीच्या प्रतीक्षेत

पणजी: राज्य आरोग्य विभागाने जाहीर केलेल्या केवळ १०० कंत्राटी परिचारिका (नर्सिंग) पदांसाठी सोमवारी (दि.४) कंपालमधील आरोग्य सेवा संचालनालय (DHS) कार्यालयाबाहेर हजारोंच्या संख्येने उमेदवारांची गर्दी उसळली. ही गर्दी इतकी प्रचंड होती की, परिसरात लांबच लांब रांगा, वाहतूक कोंडी आणि गोंधळाचे वातावरण निर्माण झाले. या दृश्याने 'पदवी मिळवली, पण पोटाची खळगी भरायला अजून संघर्ष सुरूच आहे!' या विदारक वास्तवावर पुन्हा एकदा शिक्कामोर्तब केले.

राज्यात बेरोजगारीची स्थिती किती गंभीर आहे, याचे हे फक्त एक उदाहरण आहे. गोवा रोजगार विनिमय केंद्रात नोंदणी झालेल्या एकूण ५६,२७६ उमेदवारांपैकी बहुसंख्य पदवीधर आणि पदव्युत्तर शिक्षण घेतलेले तरुण आहेत. हे आकडे केवळ चिंतेचे कारण नसून, राज्याच्या शिक्षण आणि रोजगार धोरणांवर प्रश्नचिन्ह निर्माण करणारे आहेत.

आकडेवारीनुसार, २५ वर्षांपर्यंतच्या वयोगटात मोठ्या प्रमाणात तरुणांनी नोंदणी केली आहे. यात बी.ए., बी.कॉम., बी.एस्सी. यांसारख्या पदवीधारकांची संख्या सर्वाधिक आहे. केवळ बी.कॉम. पदवीधरांची संख्या ३,४७९ इतकी आहे, तर इंजिनिअरिंगची पदवी घेऊनही ८५९ तरुण नोकरीच्या प्रतीक्षेत आहेत.

याहून गंभीर परिस्थिती २६ ते ३५ वयोगटात दिसून येते. या वयोगटातील १०,७६१ बी.कॉम. धारक आणि ४,२०७ इंजिनिअर्स नोकरीच्या शोधात आहेत. याशिवाय, एम.ए., एम.एस्सी., एम.कॉम., फार्मसी, वकील, डॉक्टर अशा उच्च शिक्षण घेतलेल्या हजारो युवकांनीही सरकारी नोकरीच्या आशेने रोजगारासाठी नोंदणी केली आहे. हे चित्र गोव्याच्या तरुणाईपुढील मोठ्या आव्हानाकडे निर्देश करत आहे.