गोवा सरकार: तरुण तेजपालविरोधात आज सुनावणी

पणजी: सहकारी महिला कर्मचाऱ्यावरील लैंगिक अत्याचाराच्या प्रकरणातून निर्दोष सुटलेल्या तरुण तेजपाल याच्याविरोधात राज्य सरकारने सादर केलेल्या आव्हान याचिकेवरील सुनावणी 14 मार्चला मुंबई उच्च न्यायालयाच्या गोवा खंडपीठासमोर ठेवण्यात आली आहे. ही सुनावणी सर्वोच्च न्यायालयात तेजपाल याने दाखल केलेल्या अर्जावरील सुनावणी प्रलंबित असल्याने वारंवार तहकूब करण्यात आली आहे.

सर्वोच्च न्यायालयात ‘इन कॅमेरा’ सुनावणीबाबतच्‍या अर्जावर अजूनही सुनावणी झाली नसल्याने मागील सुनावणीवेळी गोवा खंडपीठाने ही सुनावणी 14 मार्चपर्यंत तहकूब केली होती. ही सुनावणी इन कॅमेरा घेण्याची विनंती करणारा तेजपालचा अर्ज मुंबई उच्च न्यायालयाच्या गोवा खंडपीठाने फेटाळला होता. त्याविरुद्ध त्याने सर्वोच्च न्यायालयात अर्ज सादर केला आहे.

तेजपाल याच्या अर्जावरील सुनावणी सर्वोच्च न्यायालयातील न्यायमूर्ती आपल्यासमोर नको असे दोनवेळा झाल्याने ती वारंवार लांबणीवर पडत आहे. तेजपालच्यावतीने वकील अमित देसाई हे, तर गोवा सरकारतर्फे भारताचे सॉलिसिटर जनरल तुषार मेहता बाजू मांडत आहेत. सर्वोच्च न्यायालयातील सुनावणीवर येथील सुनावणी अवलंबून आहे.

तेजपालने राज्य सरकारच्या आव्हान याचिकेविरोधात सादर केलेल्या अर्जात ती सुनावणीस घेण्यायोग्य आहे का याबाबत तसेच सुनावणी झाल्यास ती इन कॅमेरा घ्यावी अशी विनंती केली होती. त्यातील इन कॅमेरासाठीची विनंती उच्च न्यायालयाने यापूर्वीच फेटाळली आहे. निर्दोषत्वाला आव्हान तसेच आव्हान देण्याइतपत ती योग्य आहे का, या दोन्ही मुद्यांवर पहिल्यांदा सुनावणी होईल व त्यावरील निर्णयावर पुढील सुनावणी अवलंबून असेल.