Rama Kankonkar Attack Case: जेनिटो कार्दोजच्या अडचणींत वाढ, जामिनाविरोधात आता राज्य सरकारही उच्च न्यायालयात

पणजी: करंझाळे येथील रामा काणकोणकर यांच्यावरील जीवघेण्या हल्ला प्रकरणातील मुख्य संशयित जेनिटो कार्दोज याच्या अडचणींत आता आणखी वाढ झाली आहे. यापूर्वी पीडित रामा काणकोणकर यांनी जेनिटोच्या जामिनाला उच्च न्यायालयात आव्हान दिले असतानाच, आता राज्य सरकारनेही त्याच्या जामिनाविरुद्ध मुंबई उच्च न्यायालयाच्या गोवा खंडपीठात धाव घेतली आहे. या दोन्ही याचिकांवर आता २६ फेब्रुवारी २०२६ रोजी एकत्रित सुनावणी होणार आहे.

सप्टेंबर २०२५ मध्ये करंझाळे येथे रामा काणकोणकर यांच्यावर प्राणघातक हल्ला झाला होता. या हल्ल्याचा कट जेनिटो कार्दोज याने आपल्या साथीदारांच्या मदतीने रचल्याचा आरोप पोलिस तपासात करण्यात आला आहे. याप्रकरणी पोलिसांनी आरोपपत्रदेखील दाखल केले असून, अनेक संशयितांपैकी केवळ जेनिटो कार्दोज यालाच सत्र न्यायालयाने सशर्त जामीन मंजूर केला होता.

सत्र न्यायालयाने दिलेल्या या जामीन निर्णयाला दोन स्तरांवर विरोध होत आहे. रामा काणकोणकर यांनी सुरवातीलाच उच्च न्यायालयात आव्हान याचिका दाखल करून जेनिटोचा जामीन रद्द करण्याची मागणी केली होती. आता गुरुवार, १२ फेब्रुवारी रोजी राज्य सरकारनेही अधिकृतपणे जेनिटोच्या जामिनाला विरोध दर्शवणारी याचिका सादर केली आहे. गुन्ह्याचे गांभीर्य आणि तपासातील कल पाहता त्याला जामीन मिळणे अयोग्य असल्याचे सरकारचे म्हणणे आहे.

पुढील निर्णयाकडे लक्ष!

या प्रकरणातील इतर संशयित अजूनही कोठडीत असताना केवळ मुख्य सूत्रधार मानल्या जाणाऱ्या जेनिटोला जामीन मिळाल्याने पीडित पक्षकाराने नाराजी व्यक्त केली होती. आता राज्य सरकारनेही या लढ्यात उडी घेतल्याने जेनिटोला पुन्हा एकदा तुरुंगाची हवा खावी लागण्याची शक्यता वर्तवण्यात येत आहे. खंडपीठाच्या २६ फेब्रुवारीच्या निर्णयाकडे आता सर्वांचे लक्ष लागून राहिले आहे.