Gas Cylinder Explosion: चिंबल पंचायतीजवळील बंद घरात स्फोट, तब्बल 10 लाखांचे नुकसान; तीन तासांच्या प्रयत्नानंतर आग आटोक्यात

पणजी: चिंबल पंचायतीजवळ असलेल्या एका बंद घरातील साहित्याला बुधवारी सकाळी अकराच्या सुमारास आग लागून स्वयंपाक गॅस सिलिंडरच्या स्फोटामुळे सुमारे दहा लाखांचे नुकसान झाले. या आगीत संपूर्ण साहित्य खाक झाले. जुने गोवे अग्निशमन दलाच्या जवानांनी दोन पाण्याचे बंब वापरून तीन तासांच्या अथक प्रयत्नांनंतर अधिकारी रोहिदास डी. परब यांच्या नेतृत्वाखाली ही आग आटोक्यात आणली.

अग्निशमन दलाचे अधिकारी परब यांनी दिलेल्या माहितीनुसार, घराचे मालक अनंत सुका वेळीप व त्यांचे कुटुंब घरी नव्हते. घराचे (House) दार बंद होते. पत्नी सकाळी कामाला निघून गेली होती तर मुले शाळेत गेली होती. सकाळी ११ वा.च्या सुमारास घरातून धूर येऊ लागला. त्यामुळे आजुबाजूच्या लोकानी धोका ओळखून त्याची माहिती अग्निशमन दलाला दिली.

दल घटनास्थळी पोहोचेपर्यंत ही आग भडकली होती. जुने गोवे व पणजी येथील दलाच्या दोन पाण्याचे बंब वापरण्यात आले. ही आग विझविण्यामध्ये उगम शेट गोवेकर, सुनील जल्मी, संजय सतरकर, दत्ता सिनारी व दत्ता परब यांनी यशस्वी कामगिरी बजावली.