इंधन-एलपीजी पुरवठा सुरळीत, सरकारचा दावा; रांगा न लावण्याचे नागरिकांना आवाहन

पणजी: गोव्यातील पेट्रोल, डिझेल आणि लिक्विफाइड पेट्रोलियम गॅस (एलपीजी) ची उपलब्धता सध्याची मागणी पूर्ण करण्यासाठी पुरेशी असल्याची पुष्टी राज्यातील तेल विपणन कंपन्यांनी केली आहे.

या संदर्भात आज सार्वजनिक क्षेत्रातील तेल विपणन कंपन्यांचे राज्यस्तरीय समन्वयक मधुरेंद्र के. पांडे यांनी प्रसिद्धीस दिलेल्या पत्रकात म्हटले आहे की, कंपन्या पुरवठ्याच्या परिस्थितीवर लक्ष ठेवून आहेत आणि लॉजिस्टिक्स सुरळीत करण्यासाठी, वितरणाला गती देण्यासाठी पावले उचलण्यात आली असल्याचे त्यांनी म्हटले आहे.

संपूर्ण राज्यात इंधन पुरवठा अखंडित सुरू आहे. पुरवठ्यातील स्थिरता सुनिश्चित करण्यासाठी राज्य सरकार आणि जिल्हा प्रशासनासोबत समन्वय सुरू असल्याचे त्यांनी स्पष्ट केले.

सार्वजनिक क्षेत्रातील तेल कंपन्यांनी घरगुती एलपीजी वितरणाला प्राधान्य दिले आहे. सिलिंडरचे वितरण नियोजित वेळापत्रकानुसार सुरू आहे. सध्या, उद्योग स्तरावर गोव्यात दररोज सुमारे १० हजार ६०० घरगुती एलपीजी सिलिंडर वितरित केले जातात. हे प्रमाण अलीकडील भू-राजकीय घडामोडींपूर्वी नोंदवलेल्या वितरण पातळीशी सुसंगत असून, सध्याची गरज पूर्ण करणारे आहे.

फ्री ट्रेड एलपीजी!

याशिवाय स्थलांतरित कामगार आणि स्थानिक पत्त्याचा पुरावा नसलेल्या विद्यार्थ्यांसाठी, वैध सरकारी फोटो ओळखपत्र आणि एक घोषणापत्र सादर केल्यावर अधिकृत वितरकांकडे ५ किलोचे ''फ्री ट्रेड एलपीजी'' (एफटीएल) सिलिंडर उपलब्ध आहेत.

साठेबाजी आणि काळाबाजार रोखण्यासाठी राज्य सरकार आणि जिल्हा प्रशासन बाजारपेठेत तपासणी आणि अंमलबजावणी मोहीम राबवत आहे. आतापर्यंत गोव्यातील जिल्हा प्रशासनाने ३०५ छापे टाकले असून, अनियमितता आढळलेल्या प्रकरणांमध्ये कारवाई केली आहे, असे पांडे यांनी नमूद केले आहे.