Goa Football Association: गोवा फुटबॉल असोसिएशनने मागितले ५ कोटी रुपयांचे सरकारी अनुदान

Madgao, Goa

मडगाव: राज्यात फुटबॉलच्या खेळाला प्रोत्साहन मिळावं म्हणून गोवा फुटबॉल असोसिएशनने राज्य सरकारकडे ५ कोटींच्या अनुदानाची मागणी केली आहे.

गेल्या आठवड्यात गोवा फुटबॉल असोसिएशनकडून पहिल्यांदा भाऊसाहेब बांदोडकर स्मृती करंडकाची आंतराष्ट्रीय स्थरावर आखणी करण्यात आली होती.

गोवा आणि ओडिशा यांच्यामध्ये अंतिम सामना रंगला आणि हा सामना पाहण्यासाठी मुख्यमंत्री डॉ. प्रमोद सावंत, क्रीडा मंत्री गोविंद गावडे उपस्थित होते.

मुख्यमंत्रीच्या उपस्थितीत झालेल्या बक्षीस वितरणाच्या कार्यक्रमात गोवा फुटबॉल असोसिएशनचे अध्यक्ष कायथनो फर्नांडिस यांनी सरकारच्या मदतीशिवाय हा सामना होऊ शकला नसता असे वक्तव्य केले.

येणाऱ्या काळात जर का गोव्यातील फुटबॉल क्षेत्रातील काम वाढवायचे असेल तर आणखीन आर्थिक मदत आवश्यक आहे असेही ते म्हणाले .

भाषणात पुढे बोलताना त्यांनी मुख्यमंत्री डॉ. प्रमोद सावंत आणि क्रीडा मंत्री गोविंद गावडे यांच्याजवळ गोवा फुटबॉल असोसिएशनला दरवर्षी ५ कोटी रुपयांची मदत पोहोचवावी अशी मागणी केली आहे.

राज्य सरकारच्या आर्थिक मदतीशिवाय राज्यात फुटबॉल क्षेत्रात पायाभूत सुविधांचा विकास, स्पर्धा किंवा फुटबॉल क्लब्सना आर्थिक मदत पोहोचवता येणार नाही मात्र जर का ही मदत मिळाली तर येणाऱ्या काळात गोवा फुटबॉल असोसिएशन नक्कीच बदल घडवून आणेल.