पर्यटकांच्या आरोग्याशी खेळ खपवून घेतला जाणार नाही! हणजूण, वागातोर आणि म्हापशात 'FDA'ची धडक मोहीम; अस्वच्छता आढळल्याने तीन दुकाने तात्काळ सील

म्हापसा: अन्न व औषध प्रशासनाच्या पथकाने हणजूण, वागातोर आणि म्हापसा परिसरात धडक मोहीम राबवून विविध अन्न व्यावसायिकांची तपासणी केली. यावेळी अस्वच्छता आढळल्याने तीन व्यावसायिकांना त्यांचे कामकाज तात्काळ थांबविण्याचे आदेश दिले.

तसेच, नियमांचे उल्लंघन करून विकले जाणारे ३० हजार रुपयांचे तब्बल ६० किलो काजू जप्त करून जागेवरच नष्ट केले. या मोहिमेदरम्यान रेस्टॉरंट्स खाद्यपदार्थ विक्रेते आणि काजू विक्रेत्यांसह एकूण १८ अन्न व्यवसायांची तपासणी करण्यात आली. या व्यतिरिक्त पथकाने स्ट्रीट फूड विक्रेते आणि हॉटेल्स अशा ७ व्यावसायिकांकडील वापरलेल्या खाद्यतेलाची ‘टीपीसी मीटर’द्वारे जागेवरच तपासणी केली.

या तपासणीत खाद्यतेलातील टोटल पोलर कंपाऊंड्सचे प्रमाण २५ टक्क्यांच्या मर्यादेत म्हणजेच सुरक्षित पातळीच्या आत आढळले. या पथकाने येथील ‘अलंकार क्लस्टर’चीही पाहणी केली. नियमांचे उल्लंघन करणाऱ्यांचे परवाने थेट निलंबित केले जातील, असा इशाराही अधिकाऱ्यांनी दिला आहे. ही धडक कारवाई संचालक श्वेता देसाई यांच्या मार्गदर्शनाखाली एफडीए पथकाने केली.