Goa Red Alert: गोव्यात अतिवृष्टीचा इशारा; दुसऱ्या दिवशीही रेड अलर्ट!

Goa Monsoon 2023 Red Alert: राज्यात पावसाने हाहाकार माजवला आहे. सध्या धुव्वाधार पावसामुळे अनेक पूल पाण्याखाली गेले आहेत. यामुळे आजही भारतीय हवामान विभागातर्फे राज्यात रेड अलर्ट जारी करण्यात आला आहे. यामुळे नागरिकांना सतर्कतेचा इशारा देण्यात आला आहे.

भारतीय हवामान विभागातर्फे देण्यात आलेल्या माहितीनुसार, उत्तर गोवा आणि गोव्यात अनेक ठिकाणी पुढील काही तास मुसळधार पाऊस होणार आहे. याचसोबत 60 किमी प्रतितास वारे वाहण्याची शक्यता आहे.

आज (रविवार) सकाळ 8.25 पेडणे, तिसवाडी, बार्देश, डिचोली आणि सत्तरीमध्ये पावसाच्या ढगांनी आपली हजेरी लावली असून ते उत्तर-पूर्व दिशेने सरकत असल्याने आणखी तालुके देखील प्रभावित होण्याची शक्यता आहेत.

राज्य आपत्ती व्यवस्थापन प्राधिकरण (SDMA) ने दोन्ही जिल्ह्यांमध्ये त्यांचे नियंत्रण कक्ष सक्रिय केले आहेत. पुढील २४ तासांत गोव्यात अतिवृष्टीचा अंदाज आहे. त्यामुळे लोकांना पाणी साचलेल्या किंवा पुराच्या ठिकाणी न जाण्याचा सल्ला देण्यात आला आहे.