Goa Education: 1 एप्रिलपासून शाळा सुरु करण्याला शिक्षक संघटनेकडून हिरवा झेंडा; फोंड्यातील बैठकीत नवीन धोरणाला मंजुरी

फोंडा: नवीन शैक्षणिक वर्षाची सुरुवात १ एप्रिल पासून होणार आहे. नवीन शैक्षणिक धोरणानुसार एप्रिल महिन्याच्या सुरुवातील शैक्षणिक वर्षाची सुरुवात करण्याचा निर्णय गोवा शिक्षण खात्याने घेतला आहे, आणि उच्च माध्यमिक शिक्षक संघटनेने याला संमती दर्शवली आहे. फोंडा येथे १६ फेब्रुवारी रोजी झालेल्या एका सभेत संघटनेने या निर्णयाला संमती दर्शवली आहे.

आत्तापर्यंत गोव्यात जून महिन्यात नवीन शैक्षणिक वर्षाची सुरुवात केली जायची, मात्र आता नवीन धोरणानुसार १ एप्रिल हा शाळेचा पहिला दिवस असणार आहे. हा निर्णय राष्ट्रीय आणि आंतराष्ट्रीय शिक्षा प्रणालींशी जुळणारा आहे.

यामुळे राष्ट्रीय शैक्षणिक धोरणांची अंमलबजावणी करणं सोपं जाईल असं शिक्षक संघटनेचं म्हणणं आहे. विद्यार्थ्यांसाठी तणावमुक्त वातावरण निर्माण व्हावं आणि अनुकूल शैक्षणिक पद्धतीला प्रोत्साहन मिळावं हा नवीन शैक्षणिक धोरणाचा प्रमुख उद्देश आहे. या नवीन प्रणालीचा अवलंब केल्याने सर्व शैक्षणिक संस्थांमध्ये सुसंगती आणि एकरूपता येईल.

समोर आलेल्या माहितीनुसार इयत्ता नववीपर्यंतचे निकाल शाळांना २९ एप्रिल पर्यंत जाहीर करावे लागणार असल्याचं शिक्षण खात्याचे संचालक शैलेश झिंगडे म्हणाले आहेत. नवीन शैक्षणिक वर्षाची सुरुवात निकालांच्या आगोदर जरी झाली तरीही त्यामुळे काहीही समस्या निर्माण होणार नाही, कारण सध्या गोव्यात इयत्ता आठवीपर्यंत पास करण्याचे धोरण लागू केलं गेलंय आणि नववीत नापास झाल्यास पुन्हा परीक्षा देण्याची सवलत दिली जाते.