Goa Agriculture: गोव्यात पावसाच्या तुटवड्याचा भातशेतीला फटका; 25 हेक्टर क्षेत्राचे नुकसान, शेतकऱ्यांना अर्जाचे आवाहन

पणजी: राज्यात यंदा सुमारे ३० टक्के पावसाचा तुटवडा जाणवल्याने त्याचा फटका भातशेतीला बसला आहे. विशेषतः मरड क्षेत्रात तसेच सिंचनाची सुविधा उपलब्ध नसलेल्या भागातील सुमारे २५ हेक्टर भातशेतीचे पाण्याअभावी नुकसान झाल्याचे कृषी खात्याच्या प्राथमिक अहवालात स्पष्ट झाले आहे. कृषी संचालक चंद्रहास देसाई यांनी ही माहिती दिली.

नुकसानग्रस्त शेतकऱ्यांना सरकारकडून योग्य ती मदत मिळावी यासाठी मुख्यमंत्री डॉ. प्रमोद सावंत यांनी पुढाकार घेतला आहे. नुकसान झालेल्या शेतकऱ्यांनी भातशेतीची कापणी करण्यापूर्वी संबंधित क्षेत्रीय कृषी कार्यालयात अर्ज करावा, असे आवाहन देसाई यांनी केले.

अर्ज प्राप्त झाल्यानंतर कृषी अधिकारी प्रत्यक्ष शेतावर जाऊन पाहणी करून त्याचा अहवाल सादर करतील. राज्यात मोठ्या प्रमाणावर शेतीचे नुकसान झाले नसले तरी पाण्याअभावी भात उत्पादनात घट होण्याची शक्यता आहे. अनेक भागांत कापणी सुरू झाली आहे.

२३८७९ हेक्टरमध्ये भातशेती!

गेल्या वर्षी खरीप हंगामात राज्यात २३ हजार ८७९ हेक्टर क्षेत्रात भात लागवड झाली होती. त्यातून ८० हजार ५८६ टन उत्पादन मिळाले होते. यंदा पावसाच्या तुटवड्यामुळे भात उत्पादनात किमान २० ते ३० टक्के घट होण्याची शक्यता व्यक्त करण्यात येत आहे.