Goa Development Architects: गोव्याचा विकास पर्यावरणपूरक आणि नियोजनबद्ध हवा! CM सावंत यांनी अधोरेखित केले वास्तुविशारदांचे महत्त्व

पणजी: गोव्याच्या बांधकाम क्षेत्राचा विकास करताना नावीन्यपूर्ण रचना, शाश्वत विकास आणि व्यावसायिक गुणवत्तेला प्राधान्य देणे आवश्यक आहे. राज्याच्या बांधकाम क्षेत्राला योग्य दिशा देण्याबरोबरच पर्यावरणपूरक आणि नियोजनबद्ध विकासाला चालना देण्यात वास्तुविशारदांची भूमिका महत्त्वाची आहे, असे प्रतिपादन मुख्यमंत्री डॉ. प्रमोद सावंत यांनी केले.

दोनापावला येथील गोवा आंतरराष्ट्रीय केंद्रात भारतीय वास्तुविशारद संस्था (आयआयए), गोवा शाखेच्या २०२६-२०२८ या कालावधीसाठी नव्याने स्थापन झालेल्या कार्यकारी समितीचा पदग्रहण सोहळा मुख्यमंत्र्यांच्या उपस्थितीत पार पडला. यावेळी वास्तुविशारद अमित सुखटणकर, वास्तुविशारद शिरीष पेरी तसेच वास्तुविशारद क्षेत्रातील अनेक मान्यवर उपस्थित होते.

मुख्यमंत्री डॉ. सावंत यांनी नवनियुक्त कार्यकारी समितीचे अभिनंदन करून आगामी कार्यकाळासाठी शुभेच्छा दिल्या. गोव्याच्या बांधकाम क्षेत्राच्या विकासात ही समिती प्रभावी योगदान देईल, असा विश्वास त्यांनी व्यक्त केला. राज्याच्या विकासाच्या गरजा लक्षात घेऊन आधुनिक वास्तुरचना, पर्यावरण संवर्धन आणि व्यावसायिक कौशल्य यांचा समतोल साधण्याची गरजही त्यांनी अधोरेखित केली.