![Vishwajit Rane: रुग्णाशी केलेली गैरवर्तणूक दोन परिचारिका भोवली; आरोग्यमंत्र्यांनी केली 'ही' कारवाई](http://media.assettype.com/dainikgomantak%2F2023-07%2F55cf1360-774d-4088-9779-fb4ff61726c2%2FVladimir_Putin_lost_nearly_160_generals_and_colonels_among_1500_officers_in_Russia_Ukraine_War_ann88.jpg?w=480&auto=format%2Ccompress&fit=max)
Vishwajit Rane इस्पितळातील साधनसुविधा तसेच रुग्णांना देण्यात येणाऱ्या सेवेची पाहणी करण्यासाठी आरोग्यमंत्री विश्वजीत राणे यांनी आज अचानक बांबोळी येथील दंत महाविद्यालयाला भेट दिली.
यावेळी एका महिला रुग्णाने परिचारिकांच्या गैरवर्तणुकीबाबत मंत्र्यांकडे तोंडी तक्रार करताच तडकाफडकी सोनिया केरकर आणि निकिता नाईक यांना निलंबित करण्यात आले.
त्यांच्या निलंबनाचा आदेश इस्पितळाच्या डीन डॉ. आयडा यांनी काढला. रुग्णांशी गैरवर्तणूक करणाऱ्या व सेवेत कामचुकारपणा करणाऱ्या कर्मचाऱ्यांची गय केली जाणार नाही, असा इशारा मंत्री राणे यांनी दिला.
आरोग्यमंत्री राणे यांनी डीन डॉ. आयडा यांच्यासमवेत इस्पितळाची पाहणी केली. तेथील सुविधा तसेच कमतरता असलेल्या उपकरणांचीही माहिती घेतली.
तोंडी तक्रारींचीही दखल घेणार
यावेळी एका महिला रुग्णाने परिचारिकांकडून केल्या जाणाऱ्या सतावणुकीबाबत माहिती दिली. राणे यांनी तिची कैफियत ऐकून त्या दोन परिचारिकांना चांगलेच धारेवर धरले. त्यांनी त्वरित डीन डॉ. आयडा यांना त्यांच्या निलंबनाचा आदेश काढण्याचा आदेश दिला.
रुग्णांकडून जरी तोंडी तक्रार आली असली, तरी कारवाई केली जाईल. त्यामुळे प्रत्येक कर्मचाऱ्याने चांगली सेवा करावी, अशी समज दिली.
दंत इस्पितळ २४ तास सुरू
या पाहणीवेळी काही बाबी त्यांच्या निदर्शनास आणून दिल्या. त्याबाबत लवकरच मुख्यमंत्र्यांसोबत बैठक घेऊन चर्चा करून तोडगा काढण्यात येईल. या इस्पितळात मनुष्यबळाचीही समस्या आहे.
हे दंत इस्पितळ 24 तास सुरू ठेवण्याचे आपले प्रयत्न आहेत. रुग्णांना उच्च दर्जाची सेवा देण्यासाठी सरकार कटिबद्ध असल्याचे मंत्री राणे म्हणाले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.