Goa Dairy: गोवा डेअरीच्या 14 माजी संचालकांचे पद धोक्यात,सहकार खात्याच्या उपनिबंधकांचा आदेश

Goa Dairy former directors dismissed

फोंडा: गोवा डेअरीच्या अपात्र ठरविलेल्या १४ माजी संचालकांना दूध सोसायट्यांवर संचालक म्हणून राहण्याचा कोणताही अधिकार नसून सहकार निबंधकांनी दिलेल्या निवाड्यानुसार अशा दूध सोसायट्यांवरील त्यांचे संचालकपद आपोआप बरखास्त होत असल्याचा आदेश सहकार खात्याच्या उपनिबंधकाने दिला आहे.

हा विषय सहकार खात्यात सुनावणीसाठी आला असता सहकार निबंधकांनी या सर्व संचालकांना अपात्र ठरवण्याचा आदेश दिल्यामुळे त्यांना दूध सोसायट्यांवरील मंडळांवर संचालक म्हणून राहण्याचा कोणताही अधिकार नसल्याचे सहकार खात्याच्या उत्तर विभागाच्या उपनिबंधक डॉ. म्रिशेल्दा मोंतेरो यांनी गेल्या २३ तारखेला गोवा डेअरी आणि संबंधित दूधसंस्थांना दिलेल्या आदेशवजा निवेदनात म्हटले आहे.

या आदेशानुसार राजेश फळदेसाई, विठोबा देसाई, गुरुदास परब, माधव सहकारी, धनंजय देसाई, माधवराव देसाई, बाबूराव देसाई, विजयकांत गावकर, शिवानंद पेडणेकर, राजेंद्र सावळ, उल्हास सिनारी, अजय देसाई, बाबू कोमरपंत, आसेल्मो फुर्तादो या १४ अपात्र संचालकांना दूध सोसायट्यांवरील संचालकपद सोडणे क्रमप्राप्त आहे.